Ayera mainta, trahadonan di Arubus NV a realisa un accion di protesta pa asina trece dilanti nan malcontento. Sindicato SEPPA a ofrece algun declaracion pa asina tambe informa tocante e cancelacion di e reunion entre e sindicato y mediador cu a wordo cancela varios biaha caba.

Edmundo Marlin, secretario di organisacion di sindicato SEPPA, a bisa cu sindicato a yama un reunion di urgencia pa trahadonan, pa motibo cu ayera mester a tuma luga un reunion cu mediador, director y sindicato pa discuti asuntonan di personal di Arubus N.V.

Pa nan sorpresa, nan a wordo informa cu e reunion no ta bay door ayera mas, despues cu a wordo cancela varios biaha caba.

“Akinan e trahadonan ta basta indigna pa esaki, pasobra nos tin basta tempo caba pa purba di drecha e asuntonan di trahadonan – entre otro, nan structura salarial – y esaki no tin fin di keda cla”, Marlin a expresa.

Di mesun manera, el a declara cu ora nan kier sinta pa papia cu e director nan contesta ta cu director mester haya aprobacion di Conseho, y awor cu ta existi un Conseho nan no ta haci’e. Manera Marlin a bisa, “nos a dun’e un tempo pa nos bin na mesa atrobe pa nos atende e asuntonan aki di e trahadonan cu mester a tuma luga awe, y un biaha mas, awe e reunion a wordo cancela.”

Reaccion di e trahadonan tabata di indignacion, pa motibo cu nan ta sinti cu “tin un wega cu ta wordo hunga akinan” segun Marlin a comenta. Constantemente ora e mediador ta yama reunion cu e dos partido pa nan sinta y regla e situacion cu e director, e reunion ta wordo cancela, unda segun Marlin a sigura, e director mes ta señala cu “e no por ta presente pa cualkier motibo y trahadonan ta sinti cu esaki no por sigui mas”.

E situacion aki di trahadonan di Arubus N.V ta bin prome cu 2020, kiermen ya tin dos aña cu e trahadonan ta purbando pa nan wordo scucha. Ainda na 2022 esey no a sucede, segun loke Marlin a expresa.

Pa e motibo aki nan a yama un reunion cu caracter di urgencia, pa asina sindicato por splica e trahadonan kico ta tumando luga y wak kico lo ta e siguiente pasonan cu nan lo tuma si e situacion sigui perdura manera ta bayendo na e momentonan aki.

E trahadonan nan malcontento ta cu nan asuntonan salarial y otro puntonan cu mester regla no ta kedando cla. “E director gewoon ta rek y e trahado ta sinti cu e rekmento aki no por sigui mas, pasobra nan tin mas cu shete aña caba ta wardando riba esaki y no ta keda cla”.

Pa nan aworaki ta importante pa e director comprende cu e trahadonan aki no ta bay warda mas, pa motibo cu constantemente un reunion ta wordo aplasa pa motibo di e director. Marlin a bolbe menciona cu antes tabata bisa cu “no tabata asisti debi cu no tabatin un Conseho, awor cu tin Conseho, kico ta excuus?” Marlin a enfatisa.

Di mesun forma, el a sigura cu loke trahadonan kier wak ta un rehabilitacion di e organisacion Arubus N.V y nan kier wak kico ta structura di salario cu lo tin cu presenta y esey ta locual e trahadonan kier sa.

Di otro banda, director di Arubus N.V, Edwin Mohamed tambe a duna su band’i medaya den e situacion aki. El a splica cu ora Marlin ta bisa cu cada biaha cu su persona, como director di e organisacion aki, ta pospone e reunion, “ta e mita di e berdad. Tin momentonan cu reunionnan ta wordo posponi, pero tur cos ta wordo manda pa mediador y tambe pa sindicato SEPPA”, Mohamed a indica.

E dos ultimo biaha cu e reunionnan a wordo posponi ta dia 15 di juni ultimo, mirando cu den oranan di mainta y merdia tabatin otro reunion cu Conseho locual a informa na nan tambe, manera Mohamed a sigura.

E motibo di pakico e reunion no a bay door ayera 22 di juni tabata pa motibonan personal di Mohamed, segun el a aclaria. El a propone un fecha nobo pa e reunion, esta dia 6 di juli.

Tambe el a menciona cu Arubus N.V a encamina un proceso bastante largo pa nan por a yega locual ta bay bira un salario nobo. Pa cu esaki nan a manda un carta dia 11 di maart splicando kico ta e pasonan cu a tuma y kico nan ta wardando riba dje na e momentonan aki. “No ta asina cu raad ta haya e carta y den un, dos, tres, nan lo keda cla cu esaki”, el a bisa.

E reunion cu a tuma luga dia 15 di juni ultimo cu Conseho ta pa sea tuma un pakete un tiki mas grandi cu nan tin cu traha riba dje ainda. “Nos no por duna y di esaki raad y SEPPA sa, cu mientras no tin accordering di parti di raad nos no por saca locual cu ta e informacion di salario structura cu tin. Nan a ricibi tur cos, pero e parti di salario structura ta e unico cos cu nan no a ricibi ainda”, Mohamed a enfatisa.

Igualmente, el a aclaria cu nan a splica e motibonan aki varios biaha na e trahadonan y cada biaha trahadonan kier sinta na mesa pa cu esaki. “Te ora esaki no ta wordo acorda cu raad, nos no por bay door”.

Cu e accion di protesta aki di trahadonan di Arubus N.V, e trabaonan a wordo poni plat pa un tempo di dos ora, locual den un comunicado publica riba Arubus N.V su Facebook a indica cu nan servicio di transporte lo por a sufri retraso y /of interupcion ayera diaranson 22 juni di 2022.