Ayera mainta a tuma luga un accion di protesta di parti di trahadonan di e compania AMC Unicon. E trahadonan a pone trabao plat temporalmente pa asina demostra nan malcontento cu nan dunador di trabao pa motibo cu negociacion di nan CAO ta pega.

Presidente di Sindicato di Empleadonan Publico y Priva di Aruba (SEPPA), Sra. Magaly Brito tabata presente durante e accion aki y a splica na medionan di comunicacion cu despues cu algun luna atras SEPPA a gana e referendum contra e compania, nan a bay over na discusion cu gerencia na unda a palabra cu di banda di e sindicato lo entrega un proposicion pa loke ta e negociacion di e contrato colectivo pa e trahadonan di e compania.

Segun Brito a indica, e sindicato a premira na principio cu esaki lo tuma dos pa cuater siman, pero a tuma hopi mas cu esey. A tuma dos luna mas o menos pa motibo cu e grupo ta grandi, tin diferente seccionnan y mester tene cuenta cu tur nan preocupacion- y deseonan.

SEPPA a entrega nan proposicion y despues di esey e trahadonan ta wardando pa mas cu dos luna pa ricibi un contra proposicion di banda di nan dunador di trabao, pero esaki no a wordo ricibi. Siman pasa SEPPA a cuminsa reuni cu gerencia di e compania na unda nan ta informa sindicato cu nan tabata hopi ocupa cu otro trabaonan y pa e motibo aki nan a haya cu e tema di CAO nan no por a atende cune.

“Awo riba nos pregunta si ta pa januari ainda of ta ki momento nan ta calcula cu nan por hacie, no tabatin un reaccion positivo pa motibo cu na e momentonan aki nan prioridad ta riba e periodo aki di cual nos tur sa cu comercio na Aruba ta pusha pa bende mas ainda y genera entrada”, Brito a comenta.

El a remarca cu nan tin comprension pa esaki, pero esey no ta kita afo cu tin mal contento entre trahadonan pa e hecho cu nan asuntonan no ta wordo poni riba e lista di prioridad di banda di nan dunador di trabao.

“Nos tur sa cu tin un situacion hopi fastioso aki na Aruba. Salarionan ta keda stanca hopi abao y inflacion ta bezig ta dal cartera di tur hende, di tur trahado na Aruba y trahadonan di Unicon no ta diferente”, el a agrega

Brito a sigui splica cu den 2021 e trahadonan a keda warda riba un posibel ahustacion, pero esey no a sucede ainda y ya caba 2022 ta cabando, 2023 ta den porta caba y e situacion ta crea un tension enorme bao di trahadonan mirando cu salario no ta yega y esey ta crea tambe un presion enorme pa e negociacion tuma luga mas pronto cu ta posibel.

E presidente di SEPPA a enfatisa cu e problema ta cu nan ta mira den mayoria di doñonan di trabao cu prioridad ta bay un caminda y ta lubida cu esnan cu tin cu duna e servicio, cu ta yuda den situacionnan, cu ta atende cu cliente etc. tambe ta importante. “Esaki ta locual cu netamente e trahadonan kier mustra awe, cu nan asuntonan tambe ta importante, tambe tin prioridad y pa e motibo ey nan no a keda contento”.

Segun Sra. Brito a sigui splica, siman pasa gerencia di AMC Unicon di nan banda a duna un splicacion, of nan a haci e intento di splica e trahadonan den reunionnan apart di kico ta e motibonan pakico nan no por a presenta un contra proposicion ainda pa asina discusionnan por a cuminsa.

El a subraya cu gerencia tabata sa cu desde e momento cu a bin un sindicato, e proceso di negociacion pa un contrato colectivo lo cuminsa y esaki a wordo informa tambe na gerencia y e sindictao a haci nan trabao pa e negociacion y a presenta nan proposicion.

Pa e motibo ey tambe, pasobra en bes di entrega e proposicion dentro di dos pa cuater siman, esaki a tarda y a bira ocho siman, pa e motibo ey e sindicato a duna e dunador di trabao e mesun cantidad di tempo pa asina e por elabora un contra proposicion di su banda.

Por ultimo Sra. Brito ta indica cu esey no ta kita afo cu di su banda por ta ya e tabatin un proposicion na mesa pa asina partidonan por a negocia. “Pero lastimamente nos mester a yega asina leu, pero cu esaki trahadonan simplemente kier mustra cu nan ta mal contento y cu asina no ta atende cu asuntonan cu ta toca nan. Nan tambe tin derecho pa bay dilanti, nan tambe tin derecho pa negociacion na mesa riba nan condicionnan di trabao y esaki ta locual nan ta pidiendo”, el a finalisa.