Prioridad di Gobierno den e pandemia ta pa niun hende perde trabao
Prome Minister Evelyn Wever-Croes diahuebs mainta den conferencia di prensa di Gobierno di Aruba a informa di e decisionnan cu a wordo tuma pa loke ta trata enseñansa. Por a tuma nota cu den e ultimo temponan tin un disputa andando entre SKOA y Minister di Enseñansa y esaki a pone cu esnan cu ta traha na SKOA den categoria di limpiesa nan futuro lo por ta den peliger y esaki ta algo cu Conseho di Minister no tabata kier na ningun momento.
“Nos ta den un pandemia cu a afecta henter mundo y nos Gobierno ta haciendo e maximo esfuerso pa mantene hende na trabao. Nos ta trahando duro pa manetene esnan den sector publico na trabao. Berdad mester a entrega poco pero ta pa purba manetene hende na trabao. Tambe ta purbando na mantene esnan den sector priva na trabao. Pues nos maneho y esfuersonan ta pa evita pa hende perde trabao”, Prome Minister a duna di conoce den un comunicado di prensa.
Den e caso aki pa evita esnan cu ta traha na SKOA perde trabao y mirando e disputa entre e Minister di Enseñansa y SKOA,Conseho di Minister a dicidi di pone esaki den man di mediador di gobierno. A encarga Minister di Labor Glenbert Croes pa envolvi mediador y trata na sali di e disputa y e impasse cu tin.
Mediador di gobierno a entrega su conseho y a entrega dos diferente opcion y actualmente e consehonan ta den fase final pa wak cua opcion lo scoge. Mediador di Gobierno ta propone pa no kita e hendenan aki di trabao y e dos opcionnan ta wordo studia. Mientrastanto Prome Minister a reuni tambe cu Minister di Finanzas y Asuntonan Social y hunto ta trahando na yega na un solucion pa no tin mester di retira niun hende di trabao.
“Pues mi mensahe ayera tabata pa SKOA pa no retira niun hende di trabao ya cu ta SKOA tin cu retira of tuma hende pasobra e conseho di mediador ta bay wordo sigui. Pues tur hende por keda trankil pasobra niun hende ta bay perde trabao. Mi tin cu bisa cu SKOA ta un partner hopi grandi y esun mas importante pa cu Enseñansa y loke nos kier aworaki ta stabilidad y trankilidad den e veld di Enseñansa.
