Aunke e trahadonan a bay dilanti cu un 12% riba nan salario y tambe nan a bay dilanti riba beneficionan secundario, e negociacion di e CAO cu CITGO tabata un ‘win win situation’. Nan mester a tene cuenta cu diferente aspecto, entre otro di personal y siguridad, segun presidente di IOWUA (Independent Oil Workers Union of Aruba), Boy Anthony.
E sindicalista ta haya cu un tipo di negociacion asina ta un ‘give and take’. Como sindicato nan mester tene cuenta cu CITGO ta bay inverti 1 biyon. Tambe nan ta bay crea hopi trabou. Ademas IOWUA ta spera cu aki 4 aña cu e refineria ta cuminsa produci ganashi nan lo por pidi mas riba aumento di salario.
Trahado local
El a bisa cu den e negociacion un di e prioridad tabata e cupo di trabou caminda nos trahadonan local y contratistanan local ta haya prioridad. Igualmente e trahadonan cu den pasado a haya nan mes den problema, ya sea di droga y alcohol cu por demostra cu a rehabilita y cu nan ta clean, ta haya chens di bin bek. Tambe e trahadonan cu a yega di hiba Valero corte y cu despues Valero no kier a laga nan drenta, IOWUA a logra soluciona e impasse aki cu CITGO. “Tur hende ta welcome”, el a bisa.
Despues cu nos hende local haya trabou, CITGO por bin cu trahadonan di afo, ya cu na Aruba mes no tin suficiente pa e trabou cu e refineria mes ta demanda. “Nos no tin suficiente hende pa traha”, el a laga sa.
Tambe nan a tene cuenta cu e hobennan local cu ta caba scol y cu ta desea di traha den e refineria. Nan ta bay cuminsa cu un klas di 39 hobennan ya sea cu a caba EPI of otro nivel di studio pa nan por haya un oportunidad laboral. Nan ta cuminsa cu un salario di 25 florin pa ora, pero den 7 aña nan por yega entre 43 pa 47 florin.
El a pidi un tiki di pasenshi pa e hende cu ta interesa of a yega di aplica pa traha den e refineria. El a bisa cu e proceso di tuma trahado ta bay segun nan necesidadnan.
“E ta un proceso cu ta bay poco poco y cu e ta tuma su tempo”. Prome cu fin di aña nan ta bay tuma 75 hende pa traha directamente y no cu contratista. E sindicalista, sr. Anthony a indica cu ora e proceso di rehabilita e refineria ta asina leu, ta bay tin mas of menos 500 hende trahando directamente cu CITGO.
Aworaki nan ta haciendo full un inspeccion. Nan ta kere cu pa e prome kwartaal di 2018, nan ta start e prome train. Tambe e ta kere cu pa entrante otro aña nan ta calcula cu 2500 trahado total trahando pa turn around. Compara cu Valero, e cantidad di trahadonan ta menos pasobra CITGO ta bay opera cu menos planta, ya cu e ta un upgrader. Otro factor ta e uzo di tecnologia mas avansa. E ta kere cu e concepto di e refineria como un upgrader of mehorado di crudo, ta uno ideal cu ta bay produci ganashi.
Siguridad
Otro aspecto cu sr. Anthony ta considera importante di CITGO ta su sistema di traha. Nan tin safety 24 ora pa dia y no den dia so. Pues cualkier incidente cu eventualmente lo por sosode, e trahadonan tin garantia cu tin safety riba warda. E ta considera esaki un cambio hopi importante den e forma di opera den nos refineria, ya cu e trahadonan ta keda proteha 24 ora.
Igualmente el a bisa cu IOWUA ta mantene un bon relacion di trabou cu CITGO y RdA, ya cu nan ta kere cu e solucion pa cualkier conflicto ta na mesa. El a bisa cu ambos partido a negosha di buena fe. “Bo tin e derecho sagrado cu bo por strike, pero anos a logra resolve na mesa 99% di nos problemanan y asina nos lo sigui hacie”, sr. Anthony a bisa.
