Trahadonan a bay dilanti cu 22% den salario

Ayera tardi, IOWUA (Independent Oil Workers Union of Aruba) cu ta representa e trahadonan di e refineria a firma un contracto colectivo (CAO) cu CITGO. E ta un CAO pa 4 aña, unda e presidente di IOWUA, Boy Anthony a declara cu e trahadonan a bay dilanti compara cu e CAO cu nan tabatin tempo di Valero.

Areglo
Sr. Anthony ta bisa cu e CAO cu a keda firma cu CITGO ta un logro importante y ‘hopi grandi’ pa e trahadonan. E negociacion aki tabata uno riguroso y largo. E trahadonan nan salario a bay dilanti cu 22%. Kiermen e trahadonan cu a cuminsa cu 28 florin, awor nan tin un salario nobo di 36 florin. Esaki sin conta e beneficionan secundario cual ta entre otro pensioen, plan di vakantie, plan di spaar, special banking y seguro medico adicional, unda bril a bay di 500 florin pa 750 florin. “Si bo ta wak e pakete total den e tempo aki, e ta tremendo”, el a bisa.

Tambe el a bisa cu IOWUA a logra algo historico na Aruba. Pero tambe den historia di e refineria mes cu hopi aña nan a purba di logr’e tempo di Lago, Coastal y Valero (El Paso), pero finalmente nan a logr’e cu CITGO. Pa prome biaha nan a logra cu e nan ta bay riba 12 ora di trabou pa siman. Nan a bin cu un miho orario laboral of warda di trabou.

Nan ta practicamente 5 dia liber pa siman, ya cu basicamente nan ta traha 6 luna pa aña y 6 luna nan ta liber. “Nos no a touch nada di ley. Nos ta keda traha mesun 2.184 ora”, el a bisa. Tampoco nan no ta bay traha cu menos trahado, ya cu ta keda cuater grupo di trabou. Esaki tabata un logro cu a bira posibel cu advies di USW (United Steel Workers) cu a studia e miho sistema y awor e trahadonan tin mas tempo liber. IOWUA ta afilia na USW. Antes nan tabatin 13 weekend liber y awor nan tin 26. Antes tabatin 90 dia liber y awor nan tin 180.

E areglo aki a keda concretisa diabierna ultimo y el a keda presenta e fin di siman cerca e trahadonan. Tur e trahadonan a bay di acuerdo cu e contenido, ya cu nan a haya cu tabata un bon deal. Sr. Anthony ta haya cu ta importante pa negosha riba mesa y garantisa un paz laboral, y esey ta loke finalmente a keda concretisa cu e CAO cu nan a firma cu CITGO ayera.