Trahado preventivo di Fundacion Anti Droga Aruba (FADA), Rulienne Arends a declara na Bon Dia Aruba cu e fundacion aki meymey di e pandemia, ta sigui informa y preveni nos comunidad contra e uso, abuso y traficacion di droga. Sin lubida e parti di consumo di alcohol y tabaco tambe.
Encuanto informacion di droga nobo cu ta circula den mundo baho di e negoshi aki, Arends a bisa su e substancia ta keda semper esun mas conoci na Aruba. A pesar di e pandemia, FADA por scucha di e mesun droga constantemente bao nos hobennan, sin laga un banda consumo di alcohol. Pero sigur esunnan mas conoci ta e parti di marihuana, cocaina, extasis y molly. Nan ta esunnan cu semper ta keda domina ora cu ta wordo papia di droga bao nos hobennan tambe, el a declara na Bon Dia Aruba.
A pesar di e pandemia FADA ta sigui cu su campañanan y traha riba nan. Arends a bisa cu e siman aki hopi scol a tuma contacto cu FADA. El a declara cu nan ta drentando scol pa duna charla pa nos muchanan di scol.
Cada charla nan ta dedica pa pone atencion riba e substancianan mas uza pa nos hobennan. “Cada droga tin su charla pa nos por brinda informacion na tur e hobennan y e mayornan tambe,” asina e trahado preventivo di e fundacion aki a declara.
Logicamente ora di nan charla, FADA ta tene cuenta cu tur e protocol poni pa departamento di Salubridad Publico (DVG). Tambe nan a yega di manda carta pa tur scol dunando tur e lista di tur servicio cu FADA tin di ofrece.
El a extende un invitacion tambe pa e mayornan cu ta desea pa nan yiunan por haya informacion individual por tuma contacto cu FADA. Nan tin charla completamente nobo pa ofrece y programanan di Paga Tino, etc…
