Ministerio Publico a bisa cu a haci 13 entrada hudicial den su conferencia di prensa mainta, pero atardi polis a drenta mas cas y nos ta contra cu tin 16 entrada hudicial. Na cas di minister Paul Croes nan a topa tambe cu un trahado domestico ilegal.
E señora aki a keda deteni pa deportacion. E entradanan tabata den man di personal di Landsrecherche, RST, Cuerpo Policial, FIOT, (Fiscale Inlichtingen Opsporings Team), FIOD (Fiscale Inlichtingen Opsporingsdienst di Hulanda) y Marechaussee. Momento cu e conferencia di prensa di Ministerio Publico a tuma luga, e autoridadnan ainda tabata haci nan investigacion na e cas di minister Paul Croes na Noord. Ora Bon Dia Aruba a pasa, nan a mira autonan para pafo di coordinadornan di e minister y famia. Ora nos a saca diferente potretnan (riba e pagina aki) y video (riba nos Facebook Bon Dia 24), e famia no a reacciona mucho contento. Un di e coordinadornan tambe a puntra e nomber di e reportero cual no a duna.
Despues di 20 minuut e investigadonan a sali hunto cu fiscal cu saconan y cahanan confisca. Momento cu nan a bay, e famia y coordinadornan a drenta. Un di nan tabata Giovanni Capriles cu tambe ta un di e voceronan di e minister. Nos a puntra momento cu el a drenta e cas di minister, pa puntra si e mandatario por duna un declaracion, pero na e momento e sr. Capriles a indica cu nan ta bay wak prome kico ta pasando.
Polis tambe a bay e oficina di minister Croes na Bestuurskantoor. Interesante ta cu minister president Mike Eman den un conferencia di prensa ayera a admiti cu un aña pasa ya a mustra minister Croes riba probabel iregularidad cu e control riba e permisonan di labor. Segun sr. Eman e minister a priminti den Conseho di Minister pa lo investiga esaki. Segun e minister president, e ta pensa cu sr. Croes a hacie.
*Nota: E version aki ta updated pa motibo cu tabata contene un of mas nomber cu no tabata corecto y/of no tabata tin di haber cu e caso te na e momento aki.
Por lesa rectificacion completo door di click aki.
