Ayera mainta, trahado di hospital a tene nan ‘Walk Out’ pa un ora, durante cual nan a mustra nan mal contento cu estado di e edificio y tambe pa exigi pa trece mantencion.
Presidente di Sindicato, Gina Maduro a tene palabra cu cada trahado. El a splica cu for di 8or di mainta nan tabatin nan reunion general tocante CAO y ultimo desaroyo. Nan ta den ultimo fase, na unda mester tuma decision.
Despues di esey a dicidi pa tene ‘walk out’ pa demostra nan mal contento cu e edificio. Maduro ta expresa cu tur trahado y miembro ta ‘cansa y fada’ di e situacion cu constantemente mester para servicio di algun departamento.
E ta bisa cu casi tur dia tin e mesun problema, y ta keda cancela afspraak di pashent pasobra no por duna servicio. Tin problema structural y problema di diesel. “Nos ta pidi SOGA pa saca e boiler di e edificio y nan no kier sak’e. Nos no a manda hinca un boiler.”
Cu rapport negativo di DTI, bombero y mas conseho negativo a dicidi pa hinca e boiler, segun Maduro, y cada bes ta keda haya e holo di diesel, ‘nos no ta soporta y tur trahado ta stik cu holo’.
Di parti di SOGA y AIB ta bisa cu no ta un problema, pa cual Madura ‘ta reta nan bin akiden’. Cada trahado tin pa inhala e holo di diesel. Maduro ta exigi pa saca e boiler afo, maske e tin un costo di 800.000 florin, ‘nan wak nan haya e placa, pasobra nos no a manda hinca e boiler’.
Maduro ta expresa cu no por protesta dilanti parlamento, pasobra nan mester keda na trabou y ta on call. Cu extra trabou di seca, mop y tene e luga bon. “Tin un team cu ta 24/7 disponibel pa cualkier overstroming cu tubo kibra, nan mester ta mainta, atardi y anochi pa mop, seca. Esey a para bira nos trabou di enfermeria.”
Maduro ta bisa cu a pesar di nan walk out, ningun pashent ta perhudica, sino tur ta atendi pasobra esey ta nan responsabilidad. “Nos trabou ta sigui sin pone ningun pashent na peliger.” Nan lo dirigi un carta na SOGA y peticion na minister pa saca e boiler, pa asina bin cu solucion mas lihe. Si no duna contesta, nan lo aumenta nan accion.
Si no sak’e, nan mes lo sigui cu reunion na parlamento pa culpa hospital, cu no tabata acuerdo caba pa aña pasa saca e boiler. No ta algo di awo, e ta acuerdo cu stakeholders, pero SOGA no kier saca e boiler pasobra no kier paga pa haci esaki.
Maduro ta bisa cu a midi pa mira ki solucion por trece.
Sinembargo nan ta keda para cu e boiler tin cu sali. E ta agrega cu no por traha un edificio nobo y conecta esey cu un bieu di 46 aña. “Esey ta e problema y si hospital lo a para nos tras cu nos, e scenario lo ta diferente.”
El a bisa cu for di tempo cu nan a drenta, ni un luna a pasa cu cosnan a cuminsa kibra, daña, material di mal calidad y un desaster. E ta bisa cu no a caba un proyecto y ya cosnan a kibra. “E doño ta responsabel.”
“Nan ta tira culpa riba hospital, y tempo cu a informa tocante e problemanan, nan no a para tras di nos. A bisa cu ta pa intimida, tapa of sconde, of cu persona ta negativo. Awo e titanic ta den zink”, Maduro a expresa.
Pa locual ta trata CAO, el a bisa cu esey ta bayendo bon.
