Presidente di sindicato STA (Sindicato di Trahadonan Arubano) a duna splicacion tocante e finalisacion di contract colectivo, cu gerencia di ATA y trahadonan a firma.
Diego De Cuba, presidente di e sindicato, a bisa cu tabata un situacion den cual gerencia di ATA a nenga pa sinta cu sindicato pa finalisa e contract colectivo. Na luga di esaki, e gerencia a acerca cada trahado individualmente y forsa cu documento pa e trahado firma, pa tur ricibi 1.200 florin di ‘signing bonus extra’.
De Cuba ta duna di conoce cu a desconseha e trahado pa firma, pero ‘cada ken cu nan situacion finaciero y doño di nan curpa’. El a compronde cu mayoria di nan a bay acuerdo pa firma e documento.
“STA ta kere cu ta cera espacio pa nos como sindicato por bringa, pasobra nan mes a firma. Ta keda limita, mirando cu practicamente nan a firma pa e tiki cu ATA a ofrece nan”, el a bisa.
Esey ta implica cu sindicato a dicidi conhuntamente cu nan abogado pa informa mediador pa laga ATA prepara e concepto di e contract colectivo manera cu nan a presenta na e trahadonan y cu mayoria a firma, segun De Cuba.
E ta enfatisa cu STA lo firma. “No ta bal la pena pa bay sigui discuti riba algo cu cual e trahadonan a bay di acuerdo. Aunke tabata nan boluntad, nos ta spera tambe cu mediador di gobierno tuma bon nota di kico a pasa den proceso aki.”
Proceso cu segun De Cuba, e doño di trabou a bay negosha individualmente cu cada trahado un contract colectivo. Pa ‘permiti algo asina pasa’ e ta bisa mediador para stret y yama pa trece nan paden cu locual a haci ta contra etica y ley.
El a agrega cu por pidi pa hende firma, pero esey no ta e miho manera. E ta remarca si cu ta keda na cada trahado, pasobra ningun hende ‘ta obliga bo pa firma’, ta keda na cada persona pa hacie. “Ta tristo pa bisa con trahado ta wordo intimida cu si bo no firma no ta hay’e.”
STA a keda cla y bay acuerdo cu locual e trahadonan a firma. “Locual nan a firma no ta ni 40% di locual tabata bringando p’e. Nan a firma individual, cada un a cera caminda pa sindicato sigui bringa… nan a keda contento cu nan pakete.”
E contract colectivo lo ta te cu 2022. “Nos ta firme y storia ta caba” y ta bay acuerdo cu nan decision. “Akinan ta caminda cu boluntad y caracter di trahado tin cu prevalece. Abo como empleado mester tin caracter y laga sindicato deal cune. Pero si abo mes ta scoge di firma documento, despues no por culpa sindicato.”
Firmando e documento aki, ta aleha e sindicato un banda y ta negosha nan contract individual den un contract colectivo. De Cuba a expresa cu locual nan a traha pa 2 aña largo a resulta ‘un lucha perdi’. E ta bisa cu a perde bataya, algun miembro a retira for di STA, ‘no ta resta nada mas pa sindicato bisa y no lo perde mas tempo cu esey’.
