Actualmente ta tumando luga un tayer na Ateliers ‘89 Academia di Bellas Artes,  duna pa Ruben La Cruz y Karolien Helweg unda nan ta explora hunto cu e studiantenan di e academia un parti perdi di historia Arubano: casnan traha di palo y bleki di azeta na Village pa personanan di clase trahado.

Sr. La Cruz ta conta Bon Dia Aruba cu ‘e casnan di palo aki ta e manera con San Nicolas a bin na existi di e manera cu nos tabata conoce, esta di ta e forsa economico di Aruba’.

“Durante e tempo cu Lago a bin Aruba y tambe ora Shell a yega Corsou, nan a busca hopi hende di afo pa bin traha na e refineria. E companianan a traha vivienda pa e trahadonan di afo, pero solamente pa esunnan cu posicion halto den e compania. Esunnan cu a wordo treci pa cheap labor a wordo laga na caya”.

Esaki ta algo cu segun sr. La Cruz ta pasa te ainda rond mundo, por ehempel na Dubai. Sinembargo sr. La Cruz ta conta cu den situacion asina hende ta cuminsa pensa den manera creativo.

“Ta asina cu si tabatin falta di material, nan tabata uza e palo recicla di e productonan tira afo di e refineria”. Te hasta nan a cuminsa uza blekinan di azeta pa reenforsa e casnan.

Despues di tempo e fenomeno cultural aki a bay perdi, ya cu hopi di e casnan a wordo renoba. Tambe despues cu e refineria a cera, hopi di e personanan cu tabata biba na Village, a bay afo pa busca un miho porvenir.

Raiz

Actualmente sr. La Cruz, sra. Helweg y e studiantenan cu ta tumando e tayer ta actua manera antropologonan cu ta investigando e raiznan di esunnan cu a keda biba na Village. “Mi mester bisa cu e alumnonan di Elvis Lopez (doño di Ateliers ‘89) ta hopi entusiasma pa e proyecto aki, y mi tin cu duna nan tur e credito, pasobra ta nan ta siña nos. No ta anos cu ta e maestronan, simplemente nos ta coordina e trabou cu nan kier haci.”

Pa haya un imagen mas claro di con Village a bin ta existi, sr. La Cruz y e alumnonan ta purba papia cu e comunidad di hende grandi cu a keda na Village. Loke sr. La Cruz a realisa durante e combersacionnan cu ‘hende ta hopi entusiasma pa papia y duna bo un caluroso bon bini na nan cas. E comunidad di Village ta uno hopi orguyoso di nan herencia’.

Sinembargo e docente ta expresa cu aunke a bin hopi renobacion den e bario pa hacie bunita, ta parce manera el a perde su spirito.

“Tempo cu ami a biba na San Nicolas cu mi 11 aña mi ta corda cu cada dia tabatin algo ta pasando. Semper e tabata un comunidad den movecion y alegre. Awo ora mi bishita, e hendenan ta mesun caluroso pero ta hopi keto semper.”

Esaki segun sr. La Cruz ta subraya e manera con e gobierno kier trece turismo na San Nicolas, ‘hende ta yega mas facilmente por ehempel pa medio di e brug nobo pero hende ta bin y bay, nan no ta para y combersa cu San Nicolas’.

Sra. Helweg ta spera cu pa medio di e proyecto aki titula Build your heritage into Art, hobennan por conecta cu nan herencia y raiznan y resucita un parti di nan cultura cu a bay perdi, pa asina sigui conserva esaki.

Di dos fase di proyecto

Sr. La Cruz y sra. Helweg ta ocupa cu un di dos fase di e proyecto, unda hunto cu e studiantenan nan lo documenta e fenomeno cultural di casnan traha di palo na Aruba. “E ta importante pa nos keda riba esaki pasobra nos por wak cu tur 6 isla Hulandes a wak e desaroyo di casnan traha di palo. Nos a hacie caba den pasado un proyecto na Corsou di esaki, te hasta cu nos a traha un buki titula Vergeten Monumenten cu ayudo di Stanley Brown”.

Recien un buki a wordo saca riba topico di herencia di personanan cu tabata biba na San Nicolas, titula A Sense of Belonging. Sr. La Cruz ta expresa cu esaki ta un bunita iniciativa, pero cu nan kier traha mas cu hende cu ainda ta biba na Village y relaciona esaki cu e viviendanan den e bario.

Pues e meta cu sr. La Cruz y sra. Helweg a pone pa nan mes ta pa documenta e bida di e hendenan cu a keda biba na Village y nan ta spera cu e generacion jong lo tuma interes y mando riba e proyecto.

Nan lo colabora cu Prins Bernhard Fonds y Monumentenfonds pa realisa esaki.

E exposicion di e resultadonan y proceso di e tayer lo wordo presenta riba diadomingo 1 di october 7or na Ateliers ‘89 San Nicolas, Bargestraat 2 (ex edificio di duana). E tayer ta conta cu participacion di Amy Biegstraten Jhowell Maduro, Lupita Bernabela, Facundo Franken, Jim Biegstraten y Danny Martinez.