Manera nos a publica den nos edicion di ayera, durante e Aruba Short Film Festival 2017 mas o menos 10 short film a wordo mustra na publico presente. Premionan a wordo otorga pa e miho pelicula segun e publico presente y tambe un hurado a scoge e miho pelicula, produccion y miho actor y actriz. Un par di e short film a toca temanan delicado manera salud mental y suicidio, problemanan den relacion familiar y tambe asesinato.

E aña aki e di 4 Aruba Short Film Festival a tuma luga na Crystal Theater. Invitadonan y personanan cu entusiasmo pa e genero di pelicula aki den formato corto a deleita cu snacks e mensahenan cu e produccionnan a trece dilanti. Tur produccion tabata traha pa ekiponan local di tanto profesional como amateur. Peliculanan cu a wordo presenta ta inclui entre otro: Sorry Mami, discarded, Desvela, Like & Share, Mama ta keda Mama, Naturalesa y Happy Birthday. Studiantenan di Da Vinci Academy kende ta entrenando pa bira actor of productor di pelicula a participa tambe cu e produccionnan di Happy Birthday y discarded.

E filmnan a varia den nan mensahe, aunke tin par no tabatin un mensahe mucho claro. Sinembargo tin di remarca cu e iniciativa aki ta uno positivo pa e comunidad chikito di productonan di pelicula na Aruba. E festival aki ta un bon oportunidad pa desaroya y train talento den disciplinanan artistico di actuacion, produccion, sound design, make up y direccion di escenario. E bos di Lyrick Perez tambe a resona cu e mensahe aki. Sr. Perez ta un hoben entusiasma pa traha tur tipo di pelicula. “Mi mes kier siña con pa traha films y p’esey mi t’ey, pa siña. Pero e biaha aki mi no a participa aunke proximo aña pa via di wak tanto pelicula excelente mi lo kier participa.”

Tema di depresion y suicidio den Sorry Mami
Pa e hoben e filmnan discarded y Sorry Mami a resalta riba tur otro film cu a wordo presenta. Specialmente Sorry Mami pasobra esaki a conta un storia hopi intenso uzando solamente imagennan, lagando papia un banda. “Esaki mi ta haya hopi interesante y mi mes lo kier bay den direccion aki cu mi filmnan”, e hoben a expresa. Apart di esaki e pelicula a trata un tema cu pa algun tempo ta taboe den nos sociedad, esta depresion y suicidio. E short film ta cuminsa cu e rutina di un hoben cu ta biba na Hulanda. E manera con ta introduci e topico di depresion ta masha inespera. Audiencia ta haya un mira masha cortico riba e remedi cu e hoben ta neglisha di tuma un dia cual ta yuda e hoben mantene su mes den un estado positivo pa no drenta den depresion.

Despues di esaki e hoben eventualmente ta cuminsa manipula un waya cu eventualmente e ta uza pa mata su mes. E ta prepara tambe un nota di suicidio cu solamente Sorry Mami riba dje y ta laga esaki na porta di su vivienda. E mama cu a haya sa di esaki mucho laat ta haya su yiu benta riba vloer morto. Reaccion di publico tabata fuerte suficiente cu no a aplaudi despues di e film. Edlin Boekhoudt, kende a bay mustra su apoyo pa un amiga cu a participa cu e Aruba Short Film Festival a expresa cu ‘mi a hera yora pa via di e film di suicidio’. Sra. Boekhoudt ta haya cu e short film aki por ta un wake-up call pa hende cu ta lidia cu e problema aki pa asina nan bay busca ayudo en bes di keda keto.

Dificil pa hurado pa scoge e miho
Un miembro di e hurado cu a dicidi riba cua short film lo haya reconocemento special ta Ayrton Tromp. Sr. Tromp a splica cu e decisionnan tabata dificil pasobra tin cierto actornan cu ta pas bon cu e film cu nan ta actua pe, mientras tin actor cu no ta pas cu e film. Esaki no ta descarta cu e actor su presentacion no tabata uno malo. “Tin biaha e storia mes no ta complementa e actor. Tin biaha tambe e filmamento no ta complementa e storia. Por ta e storia ta un tiki tristo pero e ta graba cu hopi colonan cla.”


Sr. Tromp a expresa cu e ta desea pa e organisacion di e film festival aki sigui den futuro. “Nos a mira cu tin hopi talento na Aruba y nos tin cu sigui desaroya esaki.” Pa esaki e hurado a gradici e organisado Isa Brown pa su esfuerso. En particular sr. Tromp a splica cu pa medio di desaroya mas short film na e isla e talento local por ascende na traha pelicula di duracion mas largo. “Na Aruba nos no ta cla pa traha filmnan largo na nivel di calidad mi ta haya.”

Sr. Tromp a sigui ilustra e punto aki cu diferente actor cu ya caba tin 4 aña ta actuando y por mira cu cada bes nan ta mehora. Alabes amateur por capta un audiencia. “E señorita Sabrina Tromp mes kende a gana miho actriz ta un bon ehempel di esaki. E no tin mucho tempo ta actua pero e la capta e huradonan di biaha.”

Like & Share ta gana cu hurado y audiencia
E short film Like & Share cual tabata un colaboracion di 3 director y tambe un escritor tanto como actor y produccion. E tema di e pelicula tabata contra bullying y specialmente cyber bullying, asina screenwriter y co-director Kenna Hernandez ta conta nos. Johnny de la Rosa tabata co-director y e persona cu a bin cu e idea. Johnny ta conta cu e idea a bin despues di mira hopi cosnan violento riba medionan social. Sr. de la Rosa den pasado a yega di dirigi peliculanan manera Libre di Pecado.

E videographer pa e proyecto aki Ronny Dotel ta conta Bon Dia cu e ta biba di su trabou como videographer. “Esaki ta e prome biaha cu mi a yega di participa cu un short film pero traha video ta parti di mi trabou cu mi ta gana mi pan cu ne.” Henter e team di Like & Share ta comparti e sintimento cu nan no tabata spera di gana, aunke nan tabata sa ‘cu nos a haci un bon trabou’.

Escritora hoben kier concentra riba traha films
Sra. Hernandez como escritora hoben a traha pa prome biaha den e ramo di film. Despues cu sr. De La Rosa a dun’e e idea sra. Hernandez a skirbi un screenplay pa e obra. Despues di gana e premio di miho short film esaki ta un empuhe grandi pa e hoben sigui den e ramo di tanto short film como feature films. Apart di esaki e hoben escritor ta skirbi buki tocante diferente topico y tambe e ta skirbi serienan.

“Den futuro mi kier traha riba un serie na Aruba pero tambe den exterior semper cu e mentalidad di hiba e nomber di Aruba padilanti.” Sra. Hernandez ta conta nos cu el a haya interes den traha serienan y filmnan pasobra desde chikito e tabata wak serie y film. “Mi tabata pensa den mi mes cu mi tambe por crea algo asina den mi mesun manera”, e hoben a expresa. E ta bin naturalmente di e hoben pa inventa scenarionan en su imaginacion, pues esaki ta facilita e tipo di trabou aki. Despues di a traha riba e film aki y comparti cu e ekipo di Like & Share el a realisa cu esaki ta mas cu un hobby, e ta un pasion di e hoben. “Mi kier echt sigui crece den dje.”

Sra. Hernandez manera nos a publica den pasado ta un di e hobennan cu a cay bou di e proyecto Dreamers cu a haya un firma liber den cuadro di e proyecto. Sinembargo obtene nacionalidad Hulandes ta keda un reto.