Siman a cuminsa cu un ‘momento importante pa futuro di turismo’ na Aruba, specificamente pa loke ta trata turismo crucero. Esta un encuentro cu ehecutivonan di Carnival Cruise Lines como tambe Royal Caribbean Cruise Lines
Esaki ATA ta informa.
Un delegacion consistiendo di minister di Turismo, Salud Publico y Deporte, Dangui Oduber (MEP), Minister di Comunicacion, Transporte y Sector Primario, Chris Romero, director di Oficina di Turismo Aruba (ATA), Ronella Tjin Asjoe-Croes hunto cu coleganan Destination Services Manager, Patrick Melchiors y Cruise Manager, Mario Arends, y di parti di Aruba Ports Authority (APA) Director Interino, Humphrey Tromp hunto cu coleganan Nautical Manager, Urvin Gil, y Senior Pilot, Dino Yarzagaray, a bay Miami pa e reunion aki.
“Esaki ta dos di e liñanan di crucero mas grandi na mundo, y como tal, sigur hopi relevante pa Aruba su industria turistico”, asina ATA ta clarifica. “E bishita tabatin como obhetivo pa analisa e aña cu ta culminando, pero principalmente pa informa di proyeccionnan, pero tambe brinda informacion di entre otro desaroyo na puerto di Aruba. Esaki no ta prome biaha cu ta trata e topico aki cu liñanan crucero, pero ta di importancia pa mantene esakinan bon informa. Minister y autoridadnan presente a reitera e compromiso di Aruba pa cu e industria y bienestar di turismo crucero. Liñanan a resalta e forsa di Aruba y e relacion estrecho cu ta existi entre autoridadnan y e ehecutivonan di ambos linea.”
ATA ta sigui splica cu: “Turismo crucero ta proyecta pa crece cu 16% e aña aki y pa otro aña ta premira cu e obhetivo di crecemento di 7% lo ser logra. Te cu october e aña aki por mira un crecemento di 23% compara cu aña pasa. E crecemento ta bin primordialmente door di crecemento den lunanan low pa turismo crucero, esta di mei pa september.” (mas riba e desaroyo crucero tambe den e articulo riba pagina 31 di e edicion aki).
Carnival Cruise Lines ta proyecta di trece un total di 185 mil turista e aña aki y lo mantene esaki pa otro aña. Di parti di Carnival Cruise Lines, Aruba ta ricibi entre otro e barco Carnival Vista. Pa loke ta trata Royal Caribbean Cruise Lines conhuntamente cu Celebrity Cruise Lines, Aruba lo ricibi un total di 195 mil pasahero e aña aki, mientras cu na 2018 esaki lo ta proyecta pa 210 mil pasahero. “Mester bisa cu Royal Caribbean Cruise Lines y Celebrity a categorisa e rating cu pasaheronan ta duna pa Aruba como esun mas fuerte pa nan den Caribe. A reteira cu semper Aruba ta score bon, pero cu Aruba a surpasa su propio rating halto e aña aki”, asina ATA ta bisa den nan relato.
Trafico pega
Puntonan di atencion cu a bin dilanti den e reunion: orarionan cu tiendanan ta habri den e area di nos capital, ilustrando cu lo ta bon pa tiendanan ta habri despues di 6 or. Tambe e variedad di oferta cu Aruba mester enfoca riba dje, parando keto aki na experiencianan nobo cu tokenan diferente y cultural. A sigur subraya e importancia di sigui pone atencion na ‘congestion’ den trafico, y riba maneho di e fluho di pasaheronan. “Hecho ta cu na Aruba pasaheronan ta sinti nan na cas y sigur y esaki mester keda manteni tambe”, ATA ta comenta.
