Trafico aereo na islanan ABC por wordo afecta pa e shinishi genera door di e erupcion di volcan La Soufriere na St. Vincent. Esaki segun informacion di Servicio Meteorologico di Corsou.

Motibo cu erupcion di e volcan La Soufriere por tin consecuencia pa trafico aereo di Aruba, Corsou y Bonaire, ta cambio di biento. “E volcan La Soufriere a sigui cu su erupcion. Situacion di biento ta cambia y biento na e momento aki ta supla mas west y esaki ta trece cu e shinishi volcanico tambe lo cuminsa bin west”, Aruba Weather Watch a declara riba su pagina di Facebook. “Por spera cu e shinishi volcanico pasa noord di e islanan ABC desde [dialuna] merdia.”

Segun observatorio terestre di NASA, despues di un siman di erupcionnan explosivo, medida di satelite ta mustra cu La Soufriere a saca alrededor di 0.4 – 0.6 teragram di dioxido di sulfur den atmosfera superior. Esey ya ta mas cu cualkier otro volcan den Caribe a produci den era di satelite. E cifranan aki por aumenta si e erupcion ta continua. “Erupcionnan modera tambe ta mas numeroso cu esunnan hopi grandi, pues efectonan cumulativo di erupcionnan asina por ta significante a traves di tempo”, segun climatologo di NASA, Ralph Kahn.

Segun NASA, medidanan di haltura di pluma volcanico y su propiedadnan tin implicacionnan mas leu di clima. MISR a detecta particulanan hopi grandi, no-esferico, y cu ta absorbe awa, indicativo di shinishi. “Pluma por causa peliger pa aviacion y calidad di aire. E haltura di inyeccion ta necesario pa inicia modelonan di pronostico cu ta pronostica e evolcion di e pluma”, Kahn a bisa. “Esey ta particularmente importante pa trafico aereo, cu mester evita shinishi.” Durante e prome siman di erupcion, medionan di comunicacion a reporta retraso di vuelonan y cancelacion den Caribe pa motibo di shinishi.

Mientras tanto, e alerta pa Aruba for di Corsou a keda valido te ayera tardi. Segun informacion di servicio meteorologico, mayoria di aerolinea cu ta bula na Aruba por a simplemente ahusta nan ruta di vuelo pa asina evadi e nubia di shinishi.

Bon Dia Aruba a tuma contacto cu Directie Luchtvaart pa puntra tocante e impacto di e cambio den biento cu por dirigi shinishi na Aruba, y con esaki lo afecta trafico aereo. Sinembargo, Directie Luchtvaart no tabata disponibel pa duna comentario.