Dialuna ultimo den oranan di mainta tempran, funcionarionan di Polis Nacional Bolivariano (PNB) su seccion Forsa di Accion Special (FAES) a detene cinco persona na estado Falcon. Nan ta sospechoso di ta miembro di un banda dedica na e traficacion ilegal di hende, entre otro pa Aruba y Corsou.

E informacion aki a wordo divulga riba e chat group di Comite Nacional di Famianan Victima di Desaparicion Forsa den e costanan di Venezuela (CONFAVIDEF), presidi pa sr. Johnny Romero y tambe publica den varios medio di comunicacion Venezolano.

E informacion divulga ta indica cu e personanan sospechoso aki tabata abordo di un Toyota, model Yaris, shinishi cu e number di plachi AA196NE, cu a detene riba caya 5 di e sector Las Malvinas di municipio Colina, na estado Falcon.

E personanan deteni di nacionalidad Venezolano a wordo identifica como: Sandrea Orangel Segundo, Primera Richard Jesús, Rojas Pereira Carlos Alberto, Guanipa Chirinos Jordi Antonio y Rosa Freites Alexander Rafael. Nan ta den poder di Ministerio Publico di Venezuela.

Den nan poder a haya entre otro un tablet cu aparentemente tin tur sorto di informacion relaciona cu e negoshi y trafico ilegal di hendenan for di Venezuela pa e islanan ABC di Reino Hulandes, esta Aruba, Bonaire y Corsou. Nan tabata cobra pa nan servicio cu placa di otro pais, tambe joyas y te hasta cu vehiculo.

Den su edicion di diamars ultimo, Bon Dia Aruba a publica cu alrededor di mas 152 persona a disparce durante aña 2019 so, entre lama cu ta separa e estadonan costero di Venezuela for di e islanan di Aruba, Bonaire y Corsou. Solamente abordo di tres boto: La Vela, Ana Maria y Jhon Eli Jose, 90 persona a disparce. Nan tabata tres piñero, dos a sali for di estado Sucre y un for di estado Falcon rumbo pa Corsou y Trinidad & Tobago.

Presidente di CONFAVIDEF, Johnny Romero a relata na e matutino aki cu e tentacion pa realisa e tipo di aventura ta sigui cobra bida di mas hende. Den su entrevista cu Bon Dia Aruba, Johnny Romero ta splica cu e estadonan Venezolano manera Falcon, ta un frontera pero tambe nan horizonte pa busca un miho condicion di bida via lama pa nan por yega na e islanan Hulandes.

“Hopi Venezolano ta mira como un alternativa e islanan aki pa busca un futuro. Tambe pa nan busca un pan pa nan yiunan y nan famia. Pa nan por sobrevivi den poco palabra,” el a bisa.