Tradicion cultural pa dia 18 di maart den Caya Grandi diferente e aña aki

Mañan Aruba ta celebra e Dia di su Himno y Bandera. Bon Dia Aruba a bay tira un bista di loke ta trata e tradicion di e dia aki den Caya Grandi, tambe conoci como Caya G.F ‘Betico’ Croes, na unda pa añanan por a aprecia algun decoracion of bandera na negoshinan of riba caya mes.

E biaha aki, tin di haci cu varios factor, como por ehemplo cu ainda e crisis di e pandemia di Covid-19 ta presente loke a hunga un rol basta importante. El a causa un golpi fuerte pa Caya Grandi cu for di algun añanan atras ya caba e situacion tabata uno preocupante.

Reportero di Bon Dia Aruba a cana y drenta den varios negoshi mirando cu algun di nan si tabatin decoracion pa dia 18 di maart, pero tambe tabatin otronan cu no. A puntra e motibo ya cu esaki ta un dia di tradicion y cultura importante pa e isla.

Pa cu esaki un di nan a contesta cu e aña aki e situacion a bira mas dificil. Nan a menciona Covid-19, treciendo dilanti cu no tin hopi cliente y ademas e decoracion ta implica tempo y placa, algo cu mayoria di nan no tin.

Por a recorda cu añanan anterior, Caya Grandi tabata uno na unda por a mira diferente decoracion, bandera y tambe actividadnan cultural cu tabata conmemora e dia special aki. Pero awor e 45 aniversario di Dia di Himno y Bandera lo ta uno diferente, igualmente door di pandemia no lo por organisa actividadnan pa evita aglomeracion di hende.

“Tin personanan cu desde chikito a crece cu e tradicion di dorna nan cas, di hisa e bandera, pero no tur hende ta mesun cos. Algun hoben awendia ta prefera di gasta placa den otro cos, e tradicion ta cabando”, un comerciante, cu a prefera di no duna su nomber, a expresa pa Bon Dia Aruba.

Tambe, el a menciona cu e mayoria di turistanan no ta bishita e area aki, ademas cu na e momentonan aki no tin crucero y e mita di negoshinan di e caya a cera, ta masha poco personanan ta drenta den caya pa cumpra algo. “Cu ki placa nos ta bay pone algo si pa nos mes no tin?”, e persona declara.

“Mester haci algo pa push e area aki, ta hopi jammer cu ta enfoca riba otro cosnan y ta laga Caya Grandi na un banda, e caya aki ta importante pa nos y pa Aruba”, el a sigura.

Pa finalisa, por observa den potretnan cu si tabatin algun negoshinan cu a wordo decora, cu a tuma e iniciativa di conmemora e dia special aki a pesar di problemanan cu comunidad y comerciantenan ta pasando na e momentonan aki.