Trabou ta cuminsa pa evalua infrastructura di KIA

KIA nobo posibel

Pronto lo por bin un instituto di coreccion nobo. Esaki ta depende si e comision encarga cu evalua e infrastructura di e instituto actual haya cu renoba esaki lo no lo nifica mucho mas costo cu traha un nobo.

Pa par di dia caba minister di husticia Andin Bikker (POR) a institui un comision encarga cu e evaluacion y inventarisacion di e infrastructura cu tin actualmente na instituto di coreccion KIA. Esaki ta pa por determina si e costo di renobacion ta mas cu 60% di loke ta costa pa construi algo nobo. Si esaki ta e caso e ora ey lo tin preferencia pa construi un instituto nobo.

Entre otro riba e task force aki lo tin e architect y tambe DOW como consehero riba e estado infrastructural di e instituto actualmente. Segun e minister, a sali den un luz menos positivo cu e dos torennan a keda desaproba, pa loke ta trata e aspecto infrastructural aki. “Esaki ta algo nos a bin ta encontra. Pa 8 aña largo e renobacion no a tuma luga pa via di retonan presupuestario, pero tambe den mi concepto e minister anterior no tabatin e habilidad di tuma decision pa bin cu un KIA cu un ambiente apropia pa esunnan cu ta traha eynan y e detenidonan.”

Esaki segun sr. Bikker ta un preocupacion mirando cu ‘e trahadonan ta trahando den un estado hopi fastioso pa tambe e aspecto di siguridad’. Ademas kier trece mas enfoke riba e concepto original di e instituto, esta pa percura cu personanan cu cay den problema por haya chens pa rehabilita y integra bek den sociedad, minister a expresa.

Recidivismo halto na KIA

“Nos a constata cu tin hopi casonan unda personanan cu a cay den KIA despues di sali ta cay bek eyden par di siman mes despues cu nan a sali. E recidivismo manera nos ta yama esaki ta hopi halto. Tin cu evita cu KIA ta bira un tipo di draaideur unda cada biaha ta mira detenidonan ta drenta bek.”

Mirando esaki, e minister conhuntamente cu procurador general Alexander van Dam a realisa un bishita par di siman atras na un instituto na Zandstad, cual segun su persona ‘tabata sumamente moderno y riba standard di Hulanda y Europa’.

E minister a sigui splica cu mirando cu Sint Maarten tambe a señala cu nan tin cierto retonan pa loke ta trata e circunstancianan di detencion. “Nos a combersa riba e tema aki pasobra nos kier subraya cu e circunstancia di detencion no ta solamente un responsabilidad di e pais pero tambe di Reino. Pues conhuntamente den cooperacion cu Reino nos kier yega na un solucion duradero pa esaki.”