Trabou final pa varios rotonde lo tuma luga un pa un

Diahuebs atardi DOW a duna un conferencia di prensa pa asina duna un actualisacion di loke ta trata e rotonde di Watty Vos Boulevard. Director Marlon Croes hunto cu João Soares a duna splicacion.

Croes a bisa cu diamars a cera e caminda di rotonde di Cumana y FCCA, pa asina traha riba e liña banda pabou. A pone trafico core den ambos caretera. E ultimo capa di asfalt lo ser poni. Awe 9or di mainta lo cera Rotonde di FCCA completo. E lo habri bek dialuna dia1 juli, 6or di mainta.

Ta pidi pa tur automobilista tene cuenta cu desviacion y pa core cu cautela. Trabou ta tumando luga pa termina mas lihe, pa sigura e trafico y tambe pa caminda ta mas accesibel.

João Soares a splica cu e rotonde di Watty Vos, tambe esun di Ling & Sons ta den nan etapa final. A stop e trabou di HATO, te ora conclui cu e rotonde di FCCA. Lo pone e capa final di asfalt. Tambe esun di caminda di Ernesto Petronia y LG. Smith Boulevard lo ser haci mañan y diasabra.

Pa esun di Irausquin ta poniendo e capa final, cu ta di Amsterdam Hotel te cu Riu Hotel. Ta trahando riba tur seccion pa keda cla cu trabou y iluminacion. E trabou na Sun Plaza ta fluyendo y ta trahando cu ‘utilities’.

Pa awe y diasabra lo ta trahando cerca di rotonde di hospital, cu lo keda cla den dos stage den entrada di hospital. Lo ta cera banda di Caya Punta Brabo pa pone asfalt. Pa e rotonde number 8 lo ta trabou pa otro siman, unda nan lo cera caminda Irausquin di Alhambra te Oceania Hotel lo habri pa ehecuta otro trabou, pa despues cera y pone asfalt.

Esey ta e plan pa e dianan binidero. Lo sigui duna informacion, sinembargo, Soares a bisa cu esaki ta e periodo cu mas impacto a trece den trafico pa ultimo capa di caminda. Nan a dicidi haci e trabou den weekend, mirando cu tin menos impacto cu den siman.

Pa loke ta trata e trabou pa haya e viabilidad lo ta den augustus, pero e proyecto completo lo ta den december. Lo tin mas trabou di landscape y centro di rotonde, pero esey no ta afecta e caretera principal.

Miembro di prensa a puntra tocante informacion di rotonde cerca di Fermin’s Bar, cu tabata afecta propiedad di hende. Soares a bisa cu ta prome biaha e ta tende esey, pa motibo cu nan ta traha cu propiedad cu gobierno a duna nan permiso. Pero lo continua cu e rotonde ora caba cu esun di Noord, pa no afecta mas trafico.