Trabou di preparatorio di DOW a minimalisa hopi e daño di mal tempo

Departamento di DOW y di Ministerio di Infrastructura a bay den accion rapido asina cu e prome informe a drenta cu tin un mal tempo biniendo cu por bira horcan y cu e posibilidad di pasa cerca di Aruba. Director di DOW, ing. Marlon Croes, tambe tabata riba caya hunto cu Ministernan di Gabinete Mike Eman pa evalua e situacion y gradici tur e funcionarionan cu a bin ta haciendo un tremendo trabou pa prepara e isla pa e mal tempo y percura pa e limpiesa despues.

“For di momento cu nos a haya e informacion cu tin un mal tempo na caminda, nos di DOW a haci hopi trabou den e parti preparatorio, limpiando rooi y canalnan, analisa e puntonan debil den nos infrastructura pa por atende cu e fluho. Na momento cu e yobida a cuminsa, nos ekipo a subi caya hopi lihe diabierna pa atende cu e situacion.”

E director di DOW a splica cu nan tabatin 6 post rond Aruba, incluyendo e base principal di DOW. For di e puntonan aki tabata controla e areanan di Aruba y e parti di costanan. Asina a bin constata cu e parti paden di Aruba tabatin menos molester y tambe a constata cu e beachnan ta esunnan cu a sufri mas daño. Pa e motibo aki a move tur material y personal na area di costanan pa haci un accion di limpiesa. Ta door di esaki por bisa cu diabierna den oranan di atardi a keda cla cu Rodgers Beach, Baby Beach y gran parti di Eagle Beach, mientras cu diasabra a keda cla cu Palm Beach y e area banda di Marriott. Sinembargo e personal mester a bolbe controla e beachnan diasabra door di e yobida fuerte cu tabatin den oranan di madruga. “Nos mester percura pa e beachnan ta den bon condicion, pasobra nan ta nos materia prima.”

Ing. Croes a splica cu DOW awor ta spera e tempo calma por completo y e awa baha bek pa evalua cuanto parti di e beachnan a bay perdi, inventarisa cuanto santo mester pa yena e beachnan pa nan ta den condicion pa wordo uza.

E preparacionnan pa e mal tempo tabata hopi bon coordina, cu e personal para pa cualkier eventualidad y esaki a yuda grandemente cu no a conoce inundacionnan grandi manera cu tabatin den pasado. E inundacionnan tabata limita na uno na Pos Chiquito, un na Santa Cruz, y na Divi Links, e punto mas abou for di unda tur awa ta yega, mester a pomp e awa pa bay na lama.