Comunidad por a tuma nota di un DOW sumamente activo henter aña den diferente bario rond di Aruba! Continuamente durante gobernacion actual por a mira cu a duna prioridad na mehoracion di camindanan mas cerca di nos hendenan esta den diferente bario.
Segun un comunicado di gobierno, 9 miyon florin a wordo poni disponibel aña pasa y e aña aki pa bay na drecha camindanan den mal estado. Aruba tin un deficit di caminda cu mester wordo drecha cu ta suma riba 200 miyon florin, pa soluciona tur e problemanan. Gobierno no tin e fondo aki, sinembargo ta reconoce si e importancia pa poco poco drecha areanan cu tin mas prioridad. Pasobra sin e deficit ta sigui aumenta.
Segun e comunicado, den combersacion cu bisiñanan por tuma nota di e sentido di alivio cerca nan door di simplemente mira DOW su presencia durante e trabounan di preparacion. Pasobra nan ta realisa cu ‘porfin’ no lo tin tanto stof mas cu ta drenta nan cas! Ademas, den e bario aki cada bes cu awa yobe e caminda ta daña, consecuentemente DOW mester a drecha esaki mas cu 4 biaha pa aña! Un situacion di ineficiencia cu awor a wordo atendi cune door di aloca fondo pa asfalta e caminda.
Pa e barionan cu ta den situacion similar ta pidi poco mas pasenshi, por mira cu Gobierno ta haciendo e maximo esfuerso pa cumpli cu mas bario cu ta posibel. Aworaki pueblo por mira unda placa ta bay y unda inversion ta wordo haci pa mehora calidad di bida tur rond di Aruba. Otro siman trabounan di preparacion ta inicia den bario di Kurimiauw pa den e proximo simannan tambe keda asfalta.
