Gobierno a lanta un comision pa trece bida den centro di Oranjestad manera ta conoci. Pero Aruba tin un otro caya hopi importante tambe cual ta na San Nicolas y pa esaki tambe gobierno ta informa cu lo tin un comision encarga pa trece un bida na esaki.

E comision nobo cu a wordo lanta ta pa stimula actividad comercial en general na Aruba segun gobierno. Eynan ta bay nace pues dos comision: uno encarga cu Caya Betico Croes y vecindario, anto e otro comision ta bay encarga su mes cu centro di San Nicolas. “Den e siguiente simannan mi ta kere nos ta asina leu, nos lo envolvi San Nicolas Business Asociation tambe. Pa nos institui e comisionnan oficialmente pa nan ranca sali cu nan trabaonan,” prome minister Evelyn Wever-Croes (MEP) a bisa. Vice prome minister/minister di Infrastructura Otmar Oduber (POR) tambe a toca riba e tema aki siman pasa durante un rueda di prensa bisando cu ta bay cuminsa ‘pick up’ trabaonan cu no a wordo continua pa locual ta desaroyo di centro di San Nicolas. Mescos cu den centro di Oranjestad, a cuminsa wak con lo instala sound system den henter e caya pa trece bida den caya, hunto cu internet. Aworaki segun gobierno, nan lo percura pa tanto na Oranjestad como na San Nicolas e servicionan aki ta obtenibel pa comunidad di Aruba.

Desaroyo di hotel
Minister Oduber ta bisa cu sigur tambe ta bay cuminsa sigui e plannan cu tabata tin cu San Nicolas Business Asociation pa desaroya no solamente e aspecto di herencia y cultura, pero a tambe desaroyo/posibilidad di hotelnan na San Nicolas. Hunto cu colega encarga cu Turismo, tabata tin un encuentro caba cu e asociacion aki y lo sigui reuni cu nan segun minister Oduber. Pasobra e aña aki ta e aña di anuncia proyectonan di hotel pariba di nos isla.

Nada a tuma luga na San Nicolas
Minister Oduber a bisa cu el a cuminsa combersa caba cu coleganan encarga cu Cultura y Turismo. “Nos ta sigui cu e plannan pa haci San Nicolas un Cultural inherited city. Lamentablemente durante practicamente un aña nada a tuma luga,” minister Oduber ta bisa.

El a sigui expresa cu: “Ni un panel solar a wordo poni, no a continua cu restauracion di Uncle Louie Store cu ya caba tabata tin tur aprobacion di parlamento, y placa caba aloca na Monumentenfonds. No a continua cu proyecto di Lolita, Changa, cu tur e cosnan akinan lo mester por a yuda forma e ciudad di cultura y herencia di Aruba.” E mandatario ta bisa sinembargo cu tur cos a cuminsa lora bek atrobe awo. Curtis Fraser ta esun encarga den bureau di minister Oduber cu ta den contacto cu DOW caba. Pronto lo tin apertura di e proyecto di Lolita cu ta wordo haci, como tambe esunnan ariba menciona pa cerca contract pa restauracionnan tuma luga. Nicolaas Store – cu mester a bira museum di San Nicolas – tambe tin un aña para. Aworaki gobierno ta bay cuminsa riba esaki atrobe y comunisa papia cu esnan encarga cu stichting di museum. Pa nan por ekipanan cu fondonan necesario – cu ya caba ta disponibel segun minister Oduber – pa di e forma aki sigui riba e ruta di crea e desaroyo economico cu kier a logra cu e creacion di un ciudad di cultura y turismo pa Aruba.


Desaroyo di refineria ‘no ta hole bon’
Minister Oduber a trece dilanti siman pasa cu algun trahadonan di Citgo a perde nan trabao, a pesar cu a sali algun noticia cu ta desmenti esaki. E mandatario a bisa cu e ta kere cu e tabata un di e poco politiconan hunto cu Marisol Lopez-Tromp di parti di POR, a trece esaki na varios ocasion, cu a bisa cu e desaroyo di e refineria ‘no ta hole bon’.

E mandatario a bolbe subraya cu e ta kere cu e refineria den su totalidad no ta bay lanta cabes pasobra nunca el a wordo haci cu buena fe. “E forma den cual a atende henter e asunto di refineria aki, nos mester tene hopi cuidao pa e no tin consecuencianan mas grandi pa nos den futuro.”

E mandatario a subraya riba e noticia di tur e cabesantenan di Citgo – esnan cu tabata atende cu ex minister Mike de Meza, Paul Croes y otronan – tur ta cera den prizon. No sa con leu ainda e investigacion aki lo bay, y si lcu zo yega te na Aruba. E 78 miyon florin cu gobierno tabata sperando pa drenta for di e reapertura aki no a drenta, y tampoco ta mustra cu lo drenta pa awo. Y pio ainda segun gobierno, e compania RDA y Citgo ta debe un cantidad di otro hende tambe; hasta proveedornan y companianan cu nan ta brinda servicio na nan, pa cual awor hende a cuminsa retira personal of hendenan mes a cuminsa bay pasobra nan no ta confia mas henter e proceso di e refineria akinan na Aruba, segun minister Otmar Oduber ta enfatisa.