Problemanan no ta di mandatario so

Trabao no falta den e prome siman di gobierno nobo. Circunstancia ta haci cu varios asunto urgente no por warda, pa haci estudio y analisis extensivo. Por ta cu no tin un solucion a corto plaso, pero importante ta cu por mira cu tin atencion y ta move. Un bon ehemplo ta e problema cu a crea cu e trabao di drecha caya den Havenstraat.

E departamento concerni a djis dicidi di dal e caya cera, sin ningun consideracion cu e trafico den centro di ciudad. No ta straño anto cu e fila riba e caminda principal di Cas di Cultura te na ex edificio di DOW tabata un desastre completo den e ultimo dianan. A cuminsa yobe keho y critica di tur banda y e ministro apenas instala mester a duna un respuesta…

Su reaccion tabata acerta, pero no tabata algo nobo, innovativo, mas bien algo di sentido comun cu e dirigencia di e departamento mes tambe por a pensa, pero no a hacie. Si nos memoria no ta faya nos, algun tempo pasa, cu a surgi e pregunta kico pa haci cu trafico pa por realisa e rotonde na Caya Betico Croes, dilanti unda tabata Marathon, nan mes a bin cu e idea di realisa e trabao durante anochi y den fin di siman, causando asina hopi menos molester pa trafico. Pakico den e caso aki e mesun idea briyante no a bin dilanti?

Ademas, e problemanan ta bay mas leu cu molester di trafico so. Despues di tur e problema cu awa na e rotonde nobo na Cumana, ta bin resulta awor, por lo menos esey nos ta lesa den prensa, cu lo mester traha un duiker grandi banda di edificio di Kooyman, pa soluciona e problema di awa na e rotonde. Kico e sabionan di DOW kier conta nos? Cu nan a traha plan pa un destaho publico, cu participacion di empresanan internacional, cu supuestamente mester tin bon reputacion tambe, anto niun hende no a corda cu e tereno mas abao na e rotonde lo mester tin salida pa awa acumula? Ora como laico bo para na e rotonde, y bo wak pazuid, bo no ta mira un halto ey cu ta core te na rotonde di Tarabana? Niun hende no mester ta ingeniero pa por deduci cu mester bin un solucion pa deshaci di awa cu ta bay acumula eynan. E siguiente pregunta ta: ken mester carga e gastonan extra di esaki?

Tur esaki ta haci nos corda e otro chasco grandi cu nos tabatin recientemente, di e proyecto di hospital, unda tambe por arte de magia a lubida cu un hospital lo mester un algo cu yama sala di operacion? Den tur e cosnan aki, ta dos posibilidad tin: of nos tin un departamento cu no ta capacita pa haci su trabao debidamente, of e cosnan aki ta sucede deliberadamente. Nos no ta kere cu ta e ultimo posibilidad aki. Y si ta e prome opcion, esey ta unda si por tuma accion pa percura cu ta tuma decision clave a base di conocemento. Den ambos caso, e asuntonan aki ta costando e comunidad un monton di placa extra, net algo cu nos no tin y no por haya fia mas tampoco.

E mesun ministro tin awor tambe e problema di e dump di Parkietenbos na su encargo. Y, sorpresa: e ultimo rapport, segun e mandatario, ta data di binti aña pasa… Nos no tin motibo pa duda di su palabra, y esaki ta yama atrobe hopi pregunta. Manera: kico e gerencia di e servicio aki tabata haci anto? Djis recolecta desperdicio, hiba dump, y punto? Cu e problema creciente di e dumpnan ilegal riba henter e isla cu tambe ta sclama pa un solucion, no a invita e ministro pa un walk in the park.

Otro asunto cu e mandatario por bay atende, ta e problema di destruccion di naturalesa na Sero Cristal, unda e recien lanta fundacion di e vecindario a tuma accion, si mester legal, pa para e responsabelnan di e destruccion aki. Atrobe aki nos ta tende e keho di e vocero di e fundacion, cu nan no ta logrando nada cu e departamentonan cu mester ta involucra, y ta parce cu ningun instancia tin un idea, o gana, di haci algo al respecto. Atrobe, kico esaki ta, ineptitud of algo pio? Talbes ainda nan ta bao influencia di e modo di opera di e ministro anterior, cu tabatin como custumber pa haci tur cos pa robes? Of ainda ta existi miedo pa actua?

Pero, pakico tur e critica pisa aki riba e funcionarionan concerni? Djis pa gana di critica? No, esaki pa ilustra cu mehora gobernacion no ta un cuestion di cambia gobierno, di cambia mandatario, y nos ta cla. E deficiencianan den e departamentonan ta hopi grandi y ta exigi accion contundente di e mandatarionan. Cu esaki nos no ta papia di persecucion politico, pasobra nos den mayoria di caso no ta ni na altura mes di e afiliacion politico di un funcionario, si acaso e tin uno. E tarea den gobernacion no ta di baha gasto so, sino tambe di mehora trabao. Nos ta desea e mandatarionan hopi sabiduria.