Caya Grandi y Dump no ta warda…

Diligencia y actuacion fuerte ta loke generalmente hende ta spera di un gobierno nobo, di cualkier. E biaha aki no ta diferente, y gobierno nobo ta trata di cumpli cu esaki. Asina nos por a mira actuacion prometedor den caso di tanto Caya Grandi como e problema di dump na Parkietenbos y esunnan ilegal plama riba henter e isla. Den ambos caso a nombra comision, den cual varios ministro a tuma asiento pa atende e cuestionnan aki mas pronto posible. Hasta a pone deadline pa percura cu e asuntonan no ta bay drumi, y tampoco esnan cu mester atende nan den e aparato gubernamental. Tur esey ta zona bon, pero e demostracion di gana y bon voluntad no mester converti den bo mes enemigo. Esun cu ta priminti, mester cumpli. Y den e casonan aki esey no ta algo asina simpel, pasobra ta trata di materia bastante complica. No ta pornada e gobierno anterior a subestima e asuntonan aki, pa bin ripara varios aña despues cu no a haci nada, en todo caso nada cu tabatin efecto.

E problematica di dump por ehemplo awor no a bira menos complica, solamente mas urgente. Tempo ta bay laga nos. Y ta bisa cu enfasis ‘nos’ pasobra e no ta un problema di gobierno so. Na prome lugar, esnan cu ta sufri di e consecuencianan di ausencia di maneho, o maneho inefectivo, ta e pueblo mes y por lo tanto ta nos problema. Pero e ta nos problema tambe den sentido cu nos mester ta parti di e solucion. Y pakico? Pasobra ta dificil imagina un sistema efectivo di procesa sushi, si no tin bon separacion di diferente tipo di desperdicio, desde inicio di e proceso. Y naturalmente esey no ta un topico popular cerca ningun mandatario, pa bon intencion cu e por tin. Ta necesario pa envolve e ciudadano individual, tambe tur empresario, y convence nan cu nan tin un papel di hunga den e proceso nobo aki, cu yama separacion di desperdicio. Si nos no haci esaki, y nos ta keda permiti cu tur cos ta yega dump manera un bulto grandi, di bateria y motor bieu, te na resto di cuminda y mata, ta tanto bal nos sinta cu esnan cu ta bin promove e solucion cu nan tin pa bende nos, pasobra e base no tey pa yega na solucion berdaderamente factible y sostenible. Esey nos por saca como un prome conclusion for di pasado recien, unda dos diferente proyecto no a fructifera. Poniendo un banda critica cu por tin tocante mal maneho te na sabotahe, aki nos mester pone e fundamento prome pa nos por tin cualkier exito.  Conclusion: ban conta e ciudadano cu ta bin un sistema di separa sushi na cas mes, y e mester colabora den esey.

E problematica di Caya Grandi ta tambe algo complica. E ‘momentum’ den e proyecto pa trece tur interesado hunto a bay perdi pasobra ta gobierno tabata dicta kico ta bay sucede, sin cu tabatin un plan cu tabata atende e preguntanan economico clave. E aspecto di embeyicimento ta importante, pero na final di dia e preguntanan central ta: Con pa atrae consumidor den Caya? Y con ta haci Caya atractivo pa comercio? Asina, no tabatin un plan pa descurasha establecimento di negoshi otro caminda y mucho menos incentivo pa establece o keda den Caya Grandi, algo cu no a cambia ainda pero ta sumamente importante pa futuro, sino nos no ta para e tendencia actual unda comercio ta huy for di ciudad. Y tin cos chikito cu ya tin nan efecto. E decision pa temporalmente suspende e cobramento pa parkeer ta zona masha popular, pero kico tabata e efecto? Den poco dia a bira casi imposible pa haya un lugar pa staciona den centro di ciudad, pasobra esnan cu ta ocupa e lugarnan pa gran parti di dia ta haci imposible pa cliente haya lugar pa parkeer; y ta nan ta paga… No tur cos cu un gobierno anterior a haci ta mal haci, aunke tin otro aspecto di e plan original cu no a resulta. Manera e asunto di e parkeervaknan geel cu ta haci cu durante gran parti di dia hopi espacio ta keda bashi, mientras cu e usuario cu kier paga no por haya un lugar pa staciona. Di e manera aki e tendencia menciona pa busca alternativa comercial na otro parti di e isla ta keda mescos.

Y ya cu nos ta papiando di ordena y reglamenta tur cos alrededor di Caya Grandi, que hubo di reglamenta e otro areanan cu actualmente ta mustra un caos enorme. Nos ta referi aki na e situacion dilanti e hotelnan y rond di e mallnan ey banda, unda ta staciona auto te hasta den oriya di e caminda grandi, cu tur e riesgonan cu esaki ta trece cune. Ta mas cu obvio cu e area aki no por maneha e fluho di auto y cu algo mester bay sucede aki. Y pa termina cu un nota positivo; nos ta riparando cu tin atencion pa e hecho cu si Caya Grandi ta keda un caya di tienda so, e no lo haya bida. Ban traha riba esey.