Ayera tardi a tuma luga e inauguracion simbolico di e renobacion di Compleho Deportivo Guillermo Prospero Trinidad. Minister di Enseñansa y Deporte, Endy Croes den presencia di Prome Minister, Evelyn Wever-Croes, demas minister, parlamentario y stakeholders, a realisa e acto simbolico aki y a duna inicio na e construccion.

Den luna di juli di 2021, Minister di Deporte e tempo ey, Dangui Oduber, hunto cu presidente di Arubaanse Voetbal Bond (AVB) Randolf Lacle, a anuncia cu Compleho Deportivo Guillermo Prospero Trinidad lo conoce un renobacion. Aworaki Minister Endy Croes, como e Minister di Deporte actual a anuncia e inicio di e proyecto aki cu ta conta cu un inversion di 3.5 miyon florin y cu tin un duracion di ocho luna.

Minister Croes a recorda cu na 1951 e parti di construccion di e stadion aki a cuminsa y riba dia 12 di april di aña 1952 a inaugura e stadion aki cu e nomber Wilhelmina Stadion. Un aña despues cu a inaugur’e, Lago e tempo ey a inverti 95 mil florin pa por a ilumina e stadion.

Na 1994 e stadion a haya un renobacion y un poco mas ampliacion, den man di e contratista Bohama, cu ta encarga cu e proyecto e biaha aki tambe y e momento ey el a cambia di nomber y a bira Compleho Deportivo Guillermo Prospero Trinidad.

El a sigui conta cu na 2008 y 2009 e stadion a bolbe haya algun touch up y e tempo ey a cambia e yerba y touch up e atletiek band.

E mandatario a menciona algun di e actividadnan historico cu a tuma luga den e compleho cu ta inclui, teamnan internacional manera Feyenoord, Transvaal y Robinhood, ekiponan grandi di Hulanda, cu a hunga weganan den e stadion, seleccion di Haiti cu a hunga wega eliminatorio pa Concacaf, Johan Cruuyf hunto cu Ajax a hunga den e stadion, entre otro.

Minister Croes a remarca cu e compleho tabata un facilidad multifacetico y no solamente deporte a tuma escenario den e stadion aki. El a indica cu diferente marchanan a tuma luga den e stadion tempo cu Aruba a pasa den e proceso pa lucha pa Status Aparte, ariba 18 maart 1976 a hisa e prome bandera di Aruba oficial y himno oficial di Aruba a resona den e compleho. Banda di esey tambe hopi concierto, carnaval y otro celebracionnan a tuma luga den e stadion.

“Awe nos a haya e oportunidad a traves di un vehiculo politico y a traves di e confiansa brinda pa nos por tin e oportunidad pa funciona cu e cartera di Minister di Enseñansa y Deporte y a toca e pasion cu nos tin y a scucha durante añanan largo e dolor cu ta biba den e deportistanan, specialmente di e deporte di futbol y atletiek cu ta esunnan cu mas ta usa e stadion aki,” el a expresa.

Desde 2016 Compleho Deportivo Guillermo Prospero Trinidad, como tambe Compleho Deportivo Frans Figaroa, a wordo desaproba pa weganan internacional, un di e motibonan principal pakico e poryecto aki ta wordo realisa.

Minister Croes a subraya cu despues di e scucha e peticion di e deportistanan, el a acerca Conseho di Minister cu e proyecto aki y aunke situaicon tabata dificil mirando cu pandemia di COVID-19 a caba di pasa, el a logra haya aprobacion pa e presupuesto di 3.5 miyon florin pa e proyecto.

“Nos por a convence cu e proyecto aki ta un proyecto esencial, e proyecto aki ta touch curason di henter comunidad, ta touch curason di henter pueblo, ta touch curason di nos deportistanan,” el a agrega.

Minister Croes a splica cu a logra aloca un suma di 3.5 miyon florin pa e proyecto di renobacion di e compleho, pero a pesar di e suma halto esaki no a alcansa pa un renobacion den su totalidad.

E trabaonan cu ta bay tuma luga ta basha e tribuna completamente abao, segun Bohama a indica esaki lo sucede manualmente pa motibo cu no kier trece ekiponan pisa riba e tereno, lo renoba e daknan completo di ambos banda, lo renoba e VIP room y ta bay agrega un baño mas pa asina tin un baño pa hende homber y uno pa hende muhe apart, lo cambia e tegelnan den e kleedkamer y tambe e oficinanan patras y e instalacion di coriente lo wordo cambia den su totalidad.

El a indica cu e parti di beton y concret ta e prome fase y mientras tanto tin un compania, Mericano, Astroturf, cu den coordinacion cu Bohama lo ta encarga cu e parti di cambio di e turf, e yerba, di futbol. Segun e minister a indica e parti aki di e proyecto solamente e ta costa entre 800 mil pa un miyon florin den su totalidad y lo bin cu un yerba cu ta miho pa medio ambiente.

Pa locual ta e luznan, esakinan tambe ta bay wordo renoba completamente. E luznan actual ta bay wordo cambia pa luznan LED y nan lo bin cu sistema di operacion nobo cu lo yuda spaar coriente.

E atlethiek band ta bay wordo renoba cu ta forma parti di e proyecto, e press booth tambe lo conoce un mehoracion y ta bay tin un scoring system nobo y mas moderno.

“Atletanan lo bay keda contento cu esaki, federacionnan lo bay keda contento cu esaki, FFD cu ta maneha e luga ta bay keda contento cu esaki y hunto mi ta kere nos ta bay tin un stadion aproba di awo pa e proximo 15 añanan. Deporte ta celebra, deporte ta di fiesta y na e deportistanan un pabien, ta di boso e ta,” el a finalisa.