Ayera mainta DOW a tene un conferencia di prensa na unda a anuncio e inicio di e proyecto di mantencion di e brug Fredis Refunjol riba Green Corridor. Director di DOW, Marlon Croes, hunto cu representante di Caribbean Infrastructure Companu (CIC), Lisandro Wernet, a elabora ariba e trabaonan di mantencion cu lo cuminsa dialuna dia 10 di juli.

Croes a splica cu e prome fase di mantencion a tuma luga caba. Aña pasa a dedica mantencion na e top di e brug y e aña durante temporada di vakantie ta bay dedica tempo na e pia- y kabelnan di e brug pa combati corosion y pa verf e brug pa trece back den bon estado.

E trabaonan di mantencion ta cuminsa dialuna dia 10 di juli y ta dura te cu 11 di augustus cu e meta cu pa ora cu scol habri back e trabaonan por ta cla y e trafico por core normal back.

E trabao di mantencion ta bay sucede den dos fase. Croes a sigui splica cu durante e prome fase lo concentra ariba e pia di e brug banda panort di brug. Esaki ta nifica cu e trafico cu ta bin for di San Nicolas direccion pa Oranjestad lo wordo desvia ariba Green Corridor mes.

Pa e desvio ta bay habri espacio riba e isla di anto memey di e careteranan pa asina por desvia e trafico, trece esaki den e lane pazuid unda cu tin un parti cu trafico lo core den dos direccion. Prome cu e trafico e rotonde di Drive-In, ta drenta back banda panort y trafico ta bira normal back di cuater lane.

E trafico cu ta bin di Oranjestad pa San Nicolas, lo cambia di core riba dos lane pa un solo lane den e pida unda trafico ta wordo desvia pa e mantencion.

Segun Croes indica ta premira cu e trabaonan di e prome fase lo dura dos siman y despues di dos siman ta cuminsa cu fase dos na unda ta cambia e trabao di mantencion di e pia di brug pa e otro banda y e ora ta bolter e trafico na e otro banda cu e mesun principio di desvio di trafico cu ta ser realisa durante fase uno.

Croes a remarca mirando e fluho di trafico pisa cu tin na cierto ora, conhuntamente cu polis a identifica cu e orario cu tin trafico mas pisa ta 7or di mainta pa 9or di mainta. El a enfatisa durante e orario aki e pida di caretera cu desvio di trafico ta bay ta habri normal. Automobilistanan por haci uso di e four lane for di 7or pa 9or pa asina tin e capacidad necesario pa e trafico por core trankil. Pa 9or ta cera e caminda back y ta haci desvio di trafico te cu siguiente mainta 7or di mainta atrobe pa e trabaonan por ser realisa.

Croes a agrega cu nan ta bay monitor esaki y si den oranan di atardi tambe trafico ta bira hopi pisa cu e desvio di trafico, lo evalua con lo maneha e trafico despues di un siman.

E director di DOW a indica tambe cu e ekipo encarga cu e proyecto di mantencion a sinta cu Arubus, polis y ambulance y tur spoedeisende dienst pa informa di e ciere aki. Tambe nan a tene cuenta cu e trucknan di gasolin di Femsa pa nan por haci e movecionnan riba e brug cu e desvio di trafico.

Lisandro Wernet di CIC y manager di proyecto di Green Corridor, a indica cu manera a menciona caba e trabaonan di mantencion lo cuminsa dia 10 di juli y pa por alcansa tur e trabaonan den un periodo mas corto posible, a scoge pa traha dobel shift. Esaki ta kiermen cu e trabaonan ta cuminsa 9or di mainta, manera cu haci e prome ciere y ta continua te cu oranan di marduga.

Pa loke ta e estado di e brug, Wernet a remarca cu e brug ta den perfecto estado. El a splica cu nan ta haci analisis y inspeccion continuo cu e expertonan, segun e contract ta indica. E compania ta purba semper di haya recomendacionnan y basa riba e recomendacionnan di 2021 a realisa cu fase uno di mantencion y fase dos ta bay tuma luga aworaki unda cu ta bay pone e brug na un condicion optimal back.

El a ratifica cu tin inspeccionnan diario y mensual ta tuma luga y e inspeccionnan anual ta tuma luga cu expertonan di afo pa sigui tur e rekisitonan contractual.

“E proyecto riba su mes ta bayendo bon. E prome aña logicamente e proyecto ta bastante nobo y ya caba nos por premira e partinan, manera esaki, cu ta necesario mantencion mayor. Preventivo semper nos ta haci durante aña y e careteranan tambe ta bay haya su rehabilitacion den e proximo añanan,” Wernet a indica.

El a agrega cu e aña aki a cuminsa cu e mantencion grandi y pa loke ta e partinan cu tin su desgaste, basa riba e contract mes nan mester cumpli cu tur e rekisitonan contractual cu ta indica cu caminda nan identifica cierto puntonan cu tin cu wordo atendi den e aña aki of proximo añanan, e compania ta zorg pa informa autoridad y atende cu esakinan.

Por ultimo Croes, director di DOW, a enfatisa cu e proyecto di Green Corridor, no solamente e brug, pero na Watty Vos Boulevard, tin un ekipo interno cu ta haci trabaonan pa controla cu nan ta cumpli cu e rekisitonan specifica den e contract y esaki ta bayendo bon.

“A base di esey mester menciona cu e ta bayendo den bon direccion y de vez en cuando tin discusion ariba interpretacion di e clausulanan di e articulonan den e contract, Pero semper cu discusion sano na mesa nos ta yega na otro pa nos por traha den bienestar di e comunidad di Aruba pa tin un red di caretera den bon condicion. Te aworaki nos ta satisfecho con e ta bayendo,” el a remarca.