Minister di Turismo y Salud Publico, Sr. Dangui Oduber, hunto cu Minister di finanzas Sra. Xiomara Maduro, Sr. Raul Gei, Director Monumenten Bureau Aruba, Sr. Francois Geerman Director di Museo Arqueologico y Sr. J. Van Kessel representante di Van Kessel Havenbouw Aruba, ta anuncia cu a firma un acuerdo pa por renoba y sigui inverti den nos herencianan cultural.
E proyecto di renobacion di e edificio di Modern Art Gallary (MAG) na Ecury Complex ta bay wordo financia pa Tourism Product Enhancement Fund (TPEF). TPEF ta bay funda e proyecto aki via su “Erfgoed”/“Heritage Post” y e proyecto aki lo demora aproximadamente cinco luna bao guia di Monumenten Bureau Aruba. Ta pa nota cu TPEF ta funda proyectonan di cultura pa di 3 biaha, segun un comunicado di gobierno. Diferente proyecto cu a wordo haci caba ta inclui instalacion di airconan nobo, restaura dak di Permanent Exhibition Area (PEG) y awo restaura ful MAG.
Minister Dangui Oduber ta splica cu TPEF ta un fondo di presupuesto cu ta haci inversionnan den embeyecemento di producto Aruba. E fondo ta inverti tambe den nos herencianan cultural y ta mantene nos costanan limpi. TPEF a bin ta financiando varios proyecto rond di Aruba pa cu nos turismo.
Ademas, e meta tras di e proyectonan aki ta pa conserva e autenticidad di Aruba su cultura y herencia pa nos turistanan por bishita nos museonan y pa asina por siña mas di nos historia. E intencion tras di e invercionan aki ta pa atrae mas bishitante na nos museonan y Museo Arqueologico ta confirma cu tin un crecemento den bishitantenan na nos museonan. Ta resalta cu den aña 2022, 4000 local y turista a bishita nos museonan y na aña 2023, esaki a subi te cu 10.000 bishitante.
Minister Dangui Oduber a indica cu su maneho di turismo ta dirigi na trece turismo di calidad, pa trece e turistanan afluente y ta sigui enfoca den diversificacion di nos turismo. E cultura di Aruba ta importante pa nos por comparti na nos turistanan.
