Diamars mainta “Tourism Product Enhancement Fund” (TPEF) a reuni cu fundacion “Stimami Sterilisami” cu ta encarga cu sterilisacion di cacho y pushi nan di caya y tambe pa yuda doñonan sterilisa nan mascota crioyo.
Na aña 2017 Stimami Sterilisami a subsidia 2438 operacionnan di sterilisacion y na aña 2018 cu mas di 4700. Stimami Sterilisami como fundacion tin como obhetivo pa yuda e comunidad di Aruba bira mas consciente riba e problematica cu tin di cacho y pushi nan riba caya. E fundacion ta subsidia 49% di e costo di cachonan femenino su operacion y 54% di cachonan masculino. Tambe e fundacion ta subsidia 52% di operacion di pushinan femenino y 50% di pushinan masculino.
Minister Dangui Oduber su maneho di turismo no solamente ta dirigi riba target turista di calidad, mehoracion di servicio y upgrading di area turistico pero tambe e ta basa pa crea un balans positivo pa e comunidad di Aruba incluyendo nos amigonan di cuater pia cu no tin un dak riba nan cabes.
Minister Oduber ta kere firmemente cu e manera con nos ta trata nos animalnan ta bisa hopi di nos como nacion. A base di programanan asina, den wowo di nos bishitantenan ta eleva e imagen di e producto Aruba y ta cumpli cu e vision di Ministerio di Turismo.
Finalmente Minister Oduber kier gradici TPEF su board pa kere den su maneho y tambe na fundacion Stimami Sterilisami pa e bon trabou haci durante ultimo añanan. Nos amigonan di cuater pia sigur tin nos amor y atencion!
