(AP) – Pa acelera e movida global den direccion di vehiculonan sostenibel, Toyota ta sugeri pa simplemente reemplasa e manera cu e vehiculonan ya caba riba caminda ta funciona cu tecnologia mas limpi manera motornan electrico.
“Mi no kier laga ningun persona cu stima auto atras,” hefe ehecutivo Aiko Toyoda a bisa diabierna mientras e tabata riba escenario na Tokyo Auto Salon, un evento di industria similar na e shownan mundial di auto.
E menasahe tabata uno hopi cla; Toyota Motor Corp kier pa mundo sa cu nan no a keda atras den e mundo di vehiculonan electrico, manera algun a implica anteriormente. Hapon su fabricante di auto mas grandi tras di e marca di luho Lexus y Prius Hybrid, ta enfatisando su poder. Nan tin tur e tecnologia, ingenieria, reserva financiero y experiencia den e industria necesario pa permanece un competidor den vehiculonan berde.
Toyoda a conta reporteronan cu e lo tuma hopi tempo pa tur e vehiculonan bira cero emision, mirando cu nan ta solamente un fraccion di e vehiculonan cu ta ser bendi. Cambia vehiculonan bieu y bira nan berde of “conversion” tabata un miho opcion segun Toyoda.
Toyoda, ken ta nieto di e fundador di e compania y un persona cu ta participa den caredanan di auto, tambe tabata sperando cu e por desmenti e stereotipo cu e vehiculonan limpi no ta mesun divertido cu vehiculonan regular. Na Toyota su Gazoo Racing Booth, e fabricante di e modelonan di luho Lexus y camry a mustra un video di su triunfo na caredanan mundial ademas di e serie cu ta usa bateria electrico Toyota AE86 cu Toyota Corolla Levin pa asina ilustra loke el a yama e “strategia di conversion.”
E industria di vehiculo ta den temponan di cambio pa motibo cu e preocupacionnan pa cu cambio di clima ta sgui aumenta. Fabricantenan hopi biaha ta ser mira como culpabelnan pa esaki. Toyoda a comenta cu e esfuersonan ecologico di e industria di vehiculo a cuminsa ser aprecia den varions nacion, sinembargo ta sinti menos aprecia na paisnan manera Hapon.
