Tourism Corporation Bonaire (TCB) ta habri luna di juni cu dos prensa di Europa di sumo importancia na Boneiro. Den e prome siman di juni, TCB den colaboracion cu Diamond Public Relations Europa a ricibi prensa di National Geographic Traveler Nederland y tambe prensa di e revista duiken na Boneiro.
Dia 6 di juni ultimo, Haroon Ali, kende ta un escritor Hulandes independiente, columnista y tambe ‘podcaster’, a bishita Boneiro pa skirbi un reportahe di 8 pa 10 pagina pa National Geographic Traveler Nederland, tocante sostenibilidad na Boneiro, esfuersonan cu ta wordo haci riba tereno di durabilidad y con bishitantenan por duna un man. Haroon ta skirbi articulo tambe pa varios medio grandi na Hulanda, manera pa e revista LINDA, Het Parool, De Volkskrant, Trouw, De Morgen, Harleems Dagblad y Noordhollandse Dagblad.
Frederik ‘Frits’ Meijst ta un fotografo specialisa den fotografia bou di awa y cu a bishita Boneiro specialmente pa saca imagen di Boneiro pa e articulo binidero. National Geographic Traveler Nederland ta un revista imprimi y tambe cu plataforma online dirigi na e mercado Hulandes cu tin un gran interes den naturalesa y cu gusta biaha. E revista y plataforma online ta ricibi mas cu 221 mil lesado.
Durante di nan estadia, Haroon y Frits a keda na dos diferente acomodacion, EcoLodge Bonaire y Delfins Beach Resort. Ambos acomodacion tin diferente iniciativanan y esfuersonan cu ta wordo haci riba e tereno di durabilidad y sostenibilidad, manera uzo di energia alternativa. Tambe, Haroon y Frits a bishita varios partner local y organisacion cu ta enfoca riba sostenibilidad y durabilidad di Boneiro, manera Mangrove Maniacs, Reef Renewal Bonaire y STINAPA. Alabes, Haroon y Frits a bishita varios empresa y persona local cu ta organisa actividadnan eko- aventura y nan a participa na diferente di e actividadnan aki, manera kayak den palo di mangel, sambuya na diferente laman y ‘land sailing’. Ademas, durante di su estadia, Haroon a skirbi un columna pa Noordhollandse Dagblad tocante di su prome dianan na Boneiro. Por lesa e columna riba e website https://www.noordhollandsdagblad.nl/cnt/DMF20210609_9057285.
Tambe na cuminsamento di juni, a ricibi prensa di e revista DUIKEN. Judith Rietveld ta e editor ehecutivo di e revista DUIKEN y hunto cu e fotografo Daniel Versteeg, nan a bin Boneiro pa skirbi un reportahe special di 9 pagina den e revista y tambe pa skirbi un reportahe special di 52 pagina riba e plataforma digital, tocante di historia di lokaalnan na Boneiro cu tin un conexion cu lama. Durante di nan estadia, Judith y Daniel a bishita varios persona local y organisacion, manera Sea Turtle Conservation Bonaire, Reef Renewal Bonaire, Freediver y Mangrove Maniacs. E bishita aki ta parti di e plan di recuperacion bou di e meta pa atrae e mercado existente Hulandes y sambuyado.
DUIKEN ta e revista Hulandes di mas grandi imprimi y tambe cu plataforma online, dirigi na e mercado di sambuyado na Hulanda, Belgica y Caribe Hulandes.
“Nos ta contento di por a ricibi prensa di National Geographic Traveler Nederland y tambe di e revista DUIKEN na Boneiro,” Derchlien Vrolijk, Marketing Coordinator di TCB, a bisa. “Nos ta sumamente orguyoso di e iniciativanan i esfuersonan cu nos partnernan, organisacionnan y habitantenan ta haci riba e tereno di durabilidad y sostenibilidad na Boneiro. Boneiro ta un di e islanan mas autentico den Caribe, cu e vision pa bira e prome ‘Blue Destinacion’ den Caribe, caminda cu habitantenan y bishitantenan por disfruta di un naturalesa bon conserva. Ta posei nos ta sigui amplia e visibilidad di Boneiro y tur locual cu e isla tin pa ofrece riba e tereno di durabilidad y sostenibilidad, actividadnan eko-aventura y buceo pa futuro bishitante.
