Den su resumen diario riba desaroyonan di pandemia di coronavirus, Departamento di Salubridad Publico (DVG) a informa cu ayera, 9 persona a recupera mientras cu a registra un total di 33 caso nobo di Covid-19, di cual uno no ta residente.
E cifranan aki ta representa un tasa di positividad entre nos residentenan di 16 porciento. E cantidad di caso activo di Covid-19 ayera tabata 164. E cantidad di fayecido relaciona cu Covid-19 no a conoce aumento y ta keda na 171.
Datonan di DVG ta ilustra casonan nobo di Covid cu un averahe semanal di diescinco caso pa dia, y un averahe di tasa di positividad semanal di diesun porciento pa dia.
Ademas, DVG a informa cu actualmente tin na Aruba 13 persona hospitalisa pa ricibi tratamento pa e malesa causa pa e virus SARS-CoV-2. Di esakinan, cuatro ta den Unidad di Cuido Intensivo ICU, mientras 9 ta riba piso general. Na Colombia actualmente tin 16 pashent di Aruba interna den ICU pa Covid-19.
