Tosamento ta causa pa un iritacion di vianan respiratorio. E iritacion aki por ta causa door di: Un infeccion di virus of algun biaha, infeccion di bacteria; Asma; Humamento; Un remedi cu tin tosamento como efecto secundario.

 

Tosamento tin un efecto protector: e ta zorg pa e particulanan straño sali for di e vianan respiratorio.

Tin dos sorto di tosamento: tos seco y tos cu slijm.
Cu tos seco apenas ta saca slijm. Tos seco (of tos cu ta pica) ta causa principalmente pa un infeccion viral. Cu tos cu slijm ta saca slijm na momento di tosa.

Kico ami mes por haci?
 Si bo ta haya molester di dolor di garganta pa motibo di tos, por usa algo pa smeer riba e garganta, manera un cuchara di honing.
Bebe suficiente, principalmente bebidanan cayente.
Pa tosamento door di griep of verkoud, ta recomenda pa bebe cada dia dos liter mas cu normal.
Si tosamento door di humamento ta bolbe regularmente of ta dura largo, lo miho ta pa stop di huma. Na momento di stop di huma, mester tene cuenta cu e tosamento na comienso por bira pio, y te despues e ta alivia.

Ki ora mester bay dokter?

Cu un tosamento simpel mayoria di biaha no tin mester bay dokter. Si tin tosamento despues di tres siman ainda, e ora ta miho pa tuma contacto cu dokter.

Algun biaha ta miho pa djis bay dokter mesora: Ora ta saca sanger of slijm bruin; problema pa hala rosea; tosamento cu ‘piep’; ora ta bebe remedi cu por ocasiona tosamento seco (por ehempel, captopril, enalapril of lisinopril).

Kico botica por haci pa mi?
 Siroop pa tos: Por alivia bo garganta cu un remedi pa tosamento cu ta contene althaea, tijm, saccharose of honing. Esaki tambe por usa durante embaraso y dunamento di pecho.

Noscapine: Si tin molester di tos seco, e ora e miho escogencia ta un remedi pa tosamento cu noscapine. Esaki ta suprimi e estimulo di tosamento y ta adecuado tanto pa mucha como adulto. Tambe por usa e remedi aki durante embaraso y dunamento di pecho. Pa tosamento cu slijm, noscapine ta menos recomenda, pasobra e slijm e ora no ta wordo saca.

Tene cuenta cu diabetes (malesa di sucu): tene cuenta cu e cantidad di sucu cu un siroop pa tosamento tin, y si esaki ta pas den bo dieet. Tambe por scoge pa un remedi sin sucu, boticario por yuda bo cu esaki.

Cua medicina ta usa?
 Remedi pa alivia tos ta suavisa e garganta. Door di esaki e tosamento ta haci menos dolor. Nan ta traha mas o menos mesun bon cu un cuchara di honing of un mangel pa suavisa e garganta. Ehempel ta althaeasiroop y tijmsiroop.

Remedi pa suprimi tos ta aumenta e drempel pa tosamento den sistema nervioso central y ta reduci door di esaki e impulso pa tosa. Ta usa nan pa tos seco, na momento cu e garganta y pulmon ta irita. Ehempelnan ta noscapine, dextromethorfan, pentoxyverine y codeine.

Algun remedi pa tos cu slijm ta stimula trahamento di slijm. Door di esaki bo por saca e slijm mas facilmente. Ehempelnan ta bebida cu anis, salmiak of zoethour.
Otro remedinan ta haci e slijm resistente mas liviano y menos resistente, asina ta mas facil pa sak’e door di tosa. Ehempel ta acetylcisteine y broomhexine.

Tratamento pa tos cu slijm mayoria di biaha no ta necesario, pasobra tosamento ta net saca e slijm. Remedinan pa tos cu slijm masha tiki ta agilisa e efecto aki.

Antihistaminica, remedi contra alergia. No ta proba di ta efectivo, pero door cu ta causa soño, bo ta drumi miho a pesar di e tosamento. No usa e remedinan aki pa tos cu slijm. Ehempelnan ta promethazine y oxomemazine.

Kamille/ Levomenthol: Si tin molester di slijm den tosamento, por facilita e sacamento di slijm door di usa vapor cu awa cayente, na cual por agrega Kamille of Levomenthol.

Pa conseho tocante tosamento of otro molester por bay directo na botica. Puntra pa e boticario.

Paul Stoutenberg, boticario
Botica San Nicolas