Diadomingo ultimo a tuma luga e di 25 torneo organisa pa Centro di Pesca Hadicurari den cuadro di Dia di Piscado. Biologo marino Byron Boekhoudt, na servicio di e fundacion aki, a expresa su satisfaccion y a cualifica esaki como un ‘bon torneo.’ Aunke lama y e clima a hunga un rol hopi fuerte den e competencia aki, pero a pesar di esey e piscadonan tabata contento.

Tabatin un cantidad di 39 boto cu a inscribi oficialmente. Den historia di e torneo aki, e ta un record di inscripcion. Pero si el a trece dilanti cu biento tabata un factor hopi grandi y coriente di lama a hunga un rol y baha e cantidad di pisca cu nan a spera di drenta. Igualmente varios boto a cay afo. Di e 39 boto cu a sali diadomingo den oranan di madruga y cu mester drenta prome cu 4’or atardi den e pier di Hadicurari, nan ta calcula cu alrededor di 20 a drenta cu pisca pa pisa.

Apesar di e factornan aki, e piscadonan cu a competi a demostra nan arte y a trece bon pisca. Ta calcula rond di 500 kilo di pisca. E ta haya cu e ta un bon presentacion cu ta duna honor na e torneo. E organisacion a bay bon y e piscadonan por a drenta tera sin problema.

Igualmente den cuadro di e torneo aki a tuma luga un investigacion cu e hoben universitario di biologia y micro biologia, Christian Romero ta bin realisando pa su tesis di grado, cu colaboracion di Departamento di Santa Rosa, Centro di Pesca Hadicurari y tur e piscadonan.

El a compila hopi muestra pa haci un estudio di nan DNA. Esaki a pesar cu e tipo di pisca cu tabata wordo spera e biaha aki a bin menos cu esun custumbra. Den e simannan venidero, e hoben aki hunto, cu e fundacion, lo sigui pidi e colaboracion di e piscadonan pa por continua cu su investigacion riba nos piscanan den e diferente centronan di pesca.

Tur persona presente a disfruta di un bon ambiente cu musica en bibo, cushina y bar bon surti. Na final a haci e anuncio di e ganadonan den e diferente categoria. E premio pa e Pisca Mas Pisa a bay pa e team cu a pisca un djampou di 36.9 kilo. Tambe e publico a probecha pa abastece di pisca fresco, y e turistanan por a bin disfruta di e festival di piscadonan organisa pa Centro di Pesca Hadicurari.