Amante di domino, prepara boso mes! Dia 26 di april proximo, bispo di Dia di Rey, e unico y exclusivo Domino Square Garden na mundo aya na Calabas/Kudawecha, tin prepara un grandioso torneo di domino estilo “buddy-buddy” pa su mas fiel participantenan di deporte di domino! Diamars 26 di april, cuminsando pa 7:30, lo ta bay tin un bataya di “patna” nunca bisto, pa cual ya pa varios siman ta bin ta train caba.
Ya cu e patnanan ta determina caba, un ta solamente domino so ta wordo getrain, ya cu condicion estricto ta cu absolutamente no mag hunga cu seña! En otro palabra, ta con n’e momento crucial, é ocasion determinante, ta bay pasa net e pida seña cu por dicidi si ta cay pa tera of pa lama? Wel shonnan, rumornan ta core rond cu aki ta trata di trikinan microscopico, un wenkbrauw cu ta hala net mita millimeter bay halto, un cabey di bigoti cu ta twist net un grado mas panort, un stem cu lo hala bira fini net un ‘mita nota’ mas halto!
Y no ta ‘zomaar iemand’ ta bay den e bataya legendario aki! Ya caba tin lista di patna cu a cay aki na redaccion di cual nos por saca afo cu nada menos cu Tony cu Chiks a cera cabes hunto; Marcelino cu Lito ta cla pa paga candela; Andy y Jadimir a join otro; nada menos cu legendario Yoyo lo join forsa cu Donovan; Sunny cu Indio a train lesa mente di otro aunke Indio kiermen su Hindu un ta djaki p’aya; Dr. Tico ta den C-mayor cu Roy Sneek; Zinho y Nevelle ta ON; Mouse cu Marc ta ‘good to go’; Donny cu Theo ta sin miedo; Gibi ‘The Coordinator’ ta forma cocolishi cu Matos; Javier y Jeff ta yen di lef; y por ultimo, Arnold y Juni tin un tabla pa laga bula e anochi aki!
Pues shonnan, manera di custumber, entrada na Domino Square Garden y e snacks nan di Han ta completamente gratis pa un y tur cu kier bin pasa un anochi sumamente emocionante pa wak ta cua dje djacanan aki lo corona ‘The Kings of Domino’! Corda bon, marca e fecha y ora! Diamars awo, 26 di april, cuminsando pa 7:30, na e unico y mundialmente famoso Domino Square Garden na e grens di Calabas/Kudawecha na Highway 69, net dilanti di e notorio palo di kwihi cu mal ehempel! Yegaaa!
