(AP) — Oficialnan na Virginia, Maine y Florida ayera tabata evaluando e daño causa pa tormentanan mayor durante weekend, incluyendo algun cu a causa blackout y a destrui cas.
E ciudad di Virginia Beach a declara un estado di emergencia despues cu un tornado a pasa door di e area y a daña mas cu 100 edificio, a tira palo abao y a causa lekmento di gas.
Oficina di Servicio Nacional di Tempo na Wakefield, Virginia, a confirma ayera mainta cu e tornado tabata categorisa na EF-3, cu biento calcula na 225kph te 240kph. A pusha casnan bon construi for di nan fundeshi, a collapse murayanan exterior, y a ranca daknan henter, segun un declaracion di e agencia.
No a reporta heridonan.
Na Maine, awasero pisa y biento poderoso a kita coriente di mas di 50mil cas y negoshi ayera mainta. E biento tabata 115kph riba diadomingo cerca di Matinicus Island, como 20 miya leu di costa, y 100kph riba costa na Bath, unda constructor di barco di marina, Bath Iron Works tin cantidad di crane. Awasero acercando 13cm a coduci na advertencia di inundacion riba varios riu den partinan den sur di Maine.
Virgina Natural Gas a responde na varios cas cu lekmento di gas, y Dominion Energy tabata reportando 250 blackout rond di Virginia Beach ayera mainta.
E tornado a subi den area di River Road y North Great Neck Road, segun oficialnan di Virginia Beach a bisa riba rednan social. Basa riba patruyahe di seguridad publico y reportahenan di residentenan, e ciudad a bisa cu mas di un decena di cas na Upper Chelsea Ranch y Haversham Close a ser afecta.
