Tormenta tropical Ramon a cuminsa crece den ultimo oranan riba awa di Pacifico Mexicano y awor ta produci hopi awacero cu ta cambia di yobida intenso pa awasero violento na estadonan na sur di Mexico, manera Oaxaca y Guerrero, Servicio Meteorologico di Mexico (SMN) a informa.
E organismo a publica den un comunicado cu tormenta Ramon ta situa na 90 kilometer na sur di Puerto Angel, na Oaxaca. Pa tal motibo a cuminsa un zona di vigilancia desde e localidad aki te altura di Acapulco, na estado Guerrero.
E tormenta ta avansa na un velocidad di 11 kilometer pa ora, cu direccion oeste- noroeste, y asina ta keda aleha di costa di Mexico. E tormenta tin hopi biento cu un velocidad di 75 kilometer pa ora y rafaga di biento di 95 kilometer.
Expertonan ta evalua posibel tormenta intenso, violento y repentino cu un velocidad di 150 pa 250 kilometer na Oaxaca. Oaxaca ta e estado cu a sufri mas daño pa e teremoto di 8.2 cu a tuma lugar dia 7 di september ultimo na sur di Mexico. Na estado di Guerrero e awa cu a cay tabata intenso cu un precipitacion di 75 pa 150 millimeter.
Servicio Meteorologico Mexicano a recomenda pa henter poblacion tuma tur precaucion necesario den actividadnan manera nabegacion riba lama na estado di Guerrero y Oaxaca, caminda lo tin hopi awacero, biento y oleahe halto.
