Den ultimo dianan por a conoce un aumento di casonan di Covid-19, na unda Gobierno di Aruba conhuntamente cu Crisis Team a dicidi di implementa y extende medidanan pa asina evita mas plamamento di e virus.

Toque de queda, un di e medidanan cu algun ciudadano ta keha di dje, a keda extendi te dia 7 di januari, segun loke Departamento di Salud Publico (DVG) y Crisis Team a informa ayera atardi, considerando con e virus ta plamando cu un ‘positivity rate’ demasiado halto, cantidad di testnan den ultimo dianan cu tabata hopi abou y awor por tuma nota cu e cantidad di testnan a aumenta, ta pone cu tin cu prolonga e medidanan.

Ta extende e medida y asina mes ta urgi comunidad henter di Aruba pa tuma nota di extension di fechanan di toque de queda, cual ta di 11or di anochi pa 5or di mainta, riba cada un di e dianan cu a keda anuncia. E orario di ciere di establecimentonan ta keda pa 10or di anochi. Crisis Team lo sigui monitorea e desaroyo di e pandemia di cerca pa tuma e pasonan necesario na tempo.

Pa loke ta trata casonan te dia di ayera, tabatin registra un total di 32 caso nobo, 31 di nan ta residente y un tabata turista, cantidad di test ehecuta entre otro laboratorio di hospital, laboratorio priva y aeropuerto ta 872 y ‘positive rate’ local a keda na 21%.

Te ayera tabatin 306 caso activo di Covid-19 na Aruba, pa lo cual hospital a informa den su rapport diario cu tin 19 pashent interna den hospital, 4 ta den unidad di cuido intensivo (ICU) y 9 ta den piso.

Por considera cu Aruba ta hayando su di tres ola di Covid-19 desde cu el a drenta na isla e dia 13 di maart di aña 2020, e variante nobo di e virus aki cu a surgi na Reino Uni te ainda no a drenta na Aruba pero por destaca cu na otro paisnan ya caba a cuminsa registra casonan di esaki como por ehemplo, na Colorado, Merca, a wordo haya dia 29 di december e prome caso, ta trata di un homber di 20 aña cu a biaha recientemente pa Reino Uni.

Tambe na Canada a reporta 2 caso e fin di siman ultimo, pa loke expertonan ta sigura cu e variante aki ta potencialmente mas contagioso cu e otro virus anterior. Na henter mundo ya caba e variante nobo tin 3.000 caso registra.