Awe referendum di trahadonan di APA

Awe mainta tempran ta tuma luga un referendum cu sindicato TOPA a pidi na departamento di Mediador di Gobierno pa representa e trahadonan di Aruba Port Authority (APA).

Anselmo Pontilius den su rol di Mediador di Gobierno a declara na Bon Dia Aruba cu e referendum aki ta tuma luga for di 8’or te cu 10’or di mainta na sala di APA mes. E referendum aki a cumpli cu e proceso legal caminda a wordo publica un aviso tambe pa cualkier otro sindicato interesa por a anuncia pa participa den e referendum aki. Logicamente pa esaki sosode, nan mester presenta e prueba di formularionan locual cu TOPA a pidi e referendum den nomber di e trahadonan a cumpli cu e exigencia aki.

E sindicato STA cu actualmente ta representa e trahadonan di APA, no a informa su interes pa participa den e referendum aki. Segun sr. Pontilius e sindicato ta liber pa haci su escogencia, ya cu nan no ta obliga di participa. Den e caso aki TOPA mester a mustra cu nan tin e cantidad di formulario necesario pa bin cu e referendum aki, y nan a purba haci esey, segun Mediador di Gobierno.

Di mas of menos 85 trahado, 65 trahado ta riba e lista cu por emiti nan voto awe mainta na APA. TOPA mester haya e 50% plus un di e cantidad di 65 trahado pa representa nan oficialmente. Si e sindicato por logra e cantidad di voto necesario nan por representa e trahadonan aki. Mediador di Gobierno a reuni cu e dunado di trabou y dirigentenan di TOPA pa evalua e ultimo detayenan prome cu referendum.

TOPA
Sindicato TOPA kier haci un yamada na tur e trahadonan di APA pa acudi masalmente na e votamento di e referendum di awe mainta na APA mes. “Asina nan por tin un representacion dignamente di sindicato TOPA”, presidente di TOPA, Rene Bernabela a declara na Bon Dia Aruba.

El a reacciona riba ‘un critica un tiki baho di e sindicato existente na e momento aki cu ta representando e trahadonan’. E ta referi na e yamada cu e sindicato STA a haci na e trahadonan di APA pa abstene di participa den e votamento di e referendum aki. Sindicalista Bernabela a bisa cu TOPA ta haya esaki un lastima y un falta di educacion y profesionalismo di parti di STA.

El a splica cu e referendum aki ta tuma luga despues cu e trahadonan di APA a acerca e sindicato pa pidi e referendum aki. Ayera el a bisa cu ta un tiki dificil pa pronostica kico ta bay ta e resultado, pero e sindicalista ta convenci cu e lo resulta positivo.

Sr. Bernabela a declara cu TOPA kier representa y sostene e trahadonan aki, ya cu actualmente nan tin un contracto colectivo (CAO) vigente te luna di augustus awor. E ta haya cu e momento a yega pa nan cuminsa negosha un CAO nobo ‘mirando cu esun cu ta existi actualmente ta bay vence’.

Segun sr. Bernabela, trahadonan di APA mester compronde cu si TOPA no ta gana e referendum, y considerando cu no tin representacion di e otro sindicato, e trahadonan no lo bay tin un representacion digno pa bay negosha e CAO nobo. Pues e CAO actual cu ta vence na augustus lo keda na vigor, te ora cu un proximo referendum lo wordo convoca.

El a haci un yamada un biaha mas na tur trahado di APA pa ‘nan no cay den un situacion sumamente peligroso y despues nan no por arepenti’ pa acudi masalmente na e votamento aki. Segun Bernabela e referendum aki ta di suma importancia pa e trahadonan di APA por tin un representacion na pia di trabou entrante awe mes.

STA
Diaranson ultimo, STA a emiti un comunicado caminda su directiva kier a informa tur e trahadonan di APA y muy specialmente su miembronan cu nan lo keda representa e trahadonan aki.

Nan ta laga sa cu ainda nan tin e mayoria, a pesar di un cantidad minimo cu a pidi nan retiro for di STA. P’esey nan no ta mira e necesidad pa STA bay participa den e referendum di awe. Na mes momento den nan comunicado nan ta pidi tur su miembronan y empleadonan cu ta sostene STA pa ‘no bay vota’ awe pasobra e ora ey automaticamente nan lo keda representa e trahadonan di APA.