Sindicato TOPA tabata satisfecho cu e resultado di e referendum di diabierna ultimo cerca mediador di gobierno, caminda nan a haya e mayoria di voto exigi pa representa e trahadonan di departamento nautico na Aruba Port Authority (APA).

Di e total di 24 trahado cu derecho di vota, 16 di nan a bay vota y nan tur a vota na fabor di TOPA. Ley di referendum tabata exigi 13 voto, kiermen e mita plus un, y TOPA a logra mas cu esey pa representa e trahadonan aki. Pero kico ta bin despues considerando cu tin presencia di otro sindicato (STA) cu tambe ta representa un gran mayoria di e trahadonan na APA?

TOPA ta consciente cu eventualmente e departamento aki no ta e total di trahadonan di APA. Sinembargo presidente di TOPA, Rene Bernabela ta considera e departamento aki como e curason di APA y esun cu ta genera entrada pa e compania aki. Sr. Bernabela ta kere cu STA lo keda atende e parti di e trahadonan cu nan ta representa, entre nan e personal di siguridad y esunnan di oficina. Pero awor cu TOPA ta representa e departamento nautico cu por bisa ta e curason di APA, nan no tin niun problema pa sinta cu cualkier otro sindicato cu tambe ta representa e otro trahadonan.

Falta di atencion
Ya caba na januari ultimo, TOPA a pidi un referendum cu no a gana pa representa e totalidad di e trahadonan di APA. Segun sr. Bernabela, despues di e resultado aki e trahadonan mes di e departamento nautico a sinti cu no tabatin representacion di e sindicato STA, y nan a keda persisti cu nan kier afilia na TOPA. Esaki a pesar cu gerencia di APA tambe a entabla un caso den corte contra convocatorio di mediador di gobierno pa realisa e referendum aki pidi pa TOPA, pero corte a faya contra gerencia di APA.

E sindicalista aki ta haya cu gerencia di APA ta dunando di conoce cu nan tin programa pa ehecuta diferente proyecto pendiente. Pero pa loke ta trata e parti di e trahadonan, nan no tin tempo ni atencion pa e trahadonan pasobra ‘nan ta bisa cu no tin placa’. Pero e ta haya cu si tin placa pa proyectonan cu APA ta bay ehecuta proximamente. Sr. Bernabela ta deduci cu ‘mester por tin placa tambe pa locual ta trahadonan pa nan por sigui haci nan trabou cu satisfaccion’.

TOPA por ripara den e ultimo tempo aki cuanto crucero a bin bishita nos isla, y sindicato ta bisa cu si no ta pa departamento nautico, niun di e cruceronan aki por mara den nos waf di Oranjestad. “Nos ta wak departamento nautico di sumamente importancia cu ta trece hopi inversion pa APA. No ta asina cu APA no ta duna e departamento tur e atencion.” TOPA lo cuminsa traha pa reestablece e orden pa locual ta e atencion cu e trahadonan mester na APA.

Negociacion CAO
El a bisa cu despues di e resultado aki nan ta bay manda un carta pa gerencia di APA pa sinta na mesa y cuminsa papia riba negociacion di un contracto colectivo nobo (CAO), ya cu esun vigente denter di poco ta bay caduca, specificamente na augustus venidero.

E sindicato ta sinti cu bou e trahadonan aki tin hopi problema, y esaki a haci cu nan a dicidi di eligi otro sindicato. E trahadonan mes a yega di expresa – segun sr. Bernabela – nan mal contento pa e falta di atencion di parti di e sindicato cu tabata representa nan, na momento cu tabata presenta dificultad na pia di trabou. “E trahadonan aki no tabata haya atencion di e sindicato cu nan tabata afilia na dje”, el a bisa.

E ta priminti cu TOPA ta bay defende y atende den nomber di e trahadonan cu gerencia di APA na momento cu ta surgi cualkier problema na pia di trabou. E ta haya hopi straño cu si un trahado ta afilia na un sindicato y si e ta pagando su contribucion, ta e deber di e sindicato pa sali na defensa di e trahado na momento cu tin problema. Esaki ta e argumento principal cu el a trece dilanti pa kico e trahadonan a dicidi di afilia sindicato TOPA. E referendum cu nan a gana ta duna representacion legal pa bay negosha CAO cu gerencia di APA den nomber di e trahadonan di e departamento nautico. E sindicalista a felicita tur trahado di departamento nautico y TOPA ta ‘sumamente contento di ta representa e trahadonan aki’.