Diadomingo trempan algun persona a topa cu un baby dolfijn morto na e beach di Boca Catalina na Malmok. E causa di su morto no ta conoci pero e tabata tin un herida basta grandi. Esaki ta un otro caso di dolfijn herida banda di beach cu Aruba ta conoce den corto tempo.

Aruba Marine Mammal Foundation a bay acudi cu un dolfijn herida na Rodgers Beach algun dia pasa y nan tambe tabata presente na Boca Catalina ayera.  Angiolina Henriquez di Aruba Marine Mammal Foundation ta splica Bon Dia Aruba cu el a haya un yamada di Central di Polis cu tin melding di un dolfijn morto na Malmok. “Nos a topa cu dos persona di strandpolitie cu tabata cuida e dolfijn. Esaki tabata un baby di 1 meter 18 cm. Nos sa cu e ta un stenella pero nos ta mirando ainda pa specifica cua tipo di stenella e ta.”

Esaki sra. Henriquez ta splica cu nan lo haci cu un “skin sample” testing pasobra door cu e ta chikito ta dificil pa distingui ki tipo e ta.  E por ta un dolfijn di oceano Tropical of Atlantico anto no ta parce e ‘spinner’ manera esun di algun dia pasa na Rodgers Beach. Algo cu e fundacion a nota tambe tabata cu ambos dolfijn tabata tin herida similar. E fundacion tabata hopi contento di a topa cu strandpolitie cu tabata t’ey pa cuida e baby dolfijn na Boca Catalina ayera. No solamente pa por sigura e acceso na e dolfijn pa tin documentacion cientifico di dje,  pero tambe seguramente pa e salud di e publico.

“Ta hopi motibo pa cual porta el a muri anto miho cos ta pa e publico keda leu for di dje en caso tin algun malesa.” Tin dos causa di mas grandi cu tin cu e fundacion ta bisa ta resalta ora ta trata e tipo di casonan aki unda ta topa dolfijn herida of morto banda di lama. Uno ta hogamento pa via di “fishing gear” y e otro ta pa via di  tribon. “Tin casonan cu tin biaha bo no sa e causa,” sra. Henriquez ta bisa.

Protocol
Sra. Henriquez ta sigui bisa cu: “Porta lo ta bon tambe pa e publico sa cu tin un protocol ora ta trata di haya un dolfijn banda di lama sea bibo of morto.” E parti mas crucial ta pa wak si e ta bibo of morto ora bo topa cu ne cual bo por wak via su ‘blowhole’. Nan ta hala rosea for di e buraco aki cu ta riba nan lomba, esaki ta habri y cera ora nan ta hala rosea y saca zonido.  Si e ta bibo, e prome cos ta pa protege su cuero, pone un serbete muha riba dje y percura pa e ‘blowhole’ nunca ta haya awa tira den dje of tapa. Si e no ta haci esey e ora obviamente e ta morto anto mester evita di mishi cu ne. Den ambos caso mester yama di biaha pa ayudo.

Sra. Henriquez ta bisa Bon Dia Aruba cu den casonan asina, nan ta e prome contacto pa yama. E fundacion aki despues ta bay over na comunica cu tur otro instancia concerni. E number di contacto ta 592-4333 anto si no ta logra localisa mesora por yama sea Wardacosta, Strandpolitie of polis mes cu tambe lo percura pa tuma contacto cu e fundacion. Esaki pues ta e protocol oficial ora cu ta topa cu bayena of dolfijn banda di lama cual ta ‘Marine Mammals’. E fundacion ta haci falta di boluntario pues nan ta haci un apelacion na comunidad pa esunnan cu ta interesa por tuma contacto cu nan mesora.

.