(AP)—E top lider politico di Hamas a ser asesina ayera pa un atake aereo durante oranan trempan di mainta den capital Irani, segun Iran y e grupo militante a bisa, culpando Israel pa un asesinato sorprendente cu a riesga escalacion bira un guera completo den e region. Lider supremo di Iran a priminti pa tuma represalia contra Israel.
Prome minister Israeli Benjamin Netanyahu a bisa cu Israel “lo refleha e prijs pisa for di cualkier agresion contra nos riba cualkier frontera” pero no a menciona e asesinato.
Israel a priminti pa mata Ismail Haniyeh y otro lidernan di Hamas pa via di e atake dia 7 di october 2023 riba e parti sur di Israel cu a resulta den e guera andante na Gaza. E atake a sosode net prome cu Haniyeh a asisti na e inauguracion di e presidente nobo Irani na Tehran—algun ora despues cu Israel a lansa un atake riba un top comandante di Hezbollah den e capital Libanes, Beirut.
E asesinato tabata posiblemente un acto explosivo mirando e conflictonan den e region pa via di e obhetivo, su tempo y e decision pa conduci’e na Tehran. Mas peligroso tabata e posibilidad pa pusha Iran y Israel den confrontacion directo si Iran tuma represalia. Merca y otro nacionnan a bringa pa preveni un conflicto mas amplio y mortal.
Den un declaracion riba su website oficial, lider supremo Irani Ayatollah Ali Khamenei a bisa cu represalia tabata “nos deber” y cu Israel a “prepara un castigo pisa pa su mes” por medio di mata “un bishitante keri den nos hogar.”
Rivalnan regional, Israel y Iran a riesga drenta un guera en completo na comienso di aña ora Israel a ataca e embahada Irani na Damascus na april. Iran a tuma represalia, y Israel a lansa un contraofensiva den un intercambio sin precedencia di atakenan riba otro su tera, pero esfuersonan internacional a logra contene e ciclo ey prome cu e plama for di control.
E asesinato di Haniyeh tambe por causa Hamas retira for di e negociacionnan pa un alto el fuego y un trato pa e liberacion di rehen den e di dies luna di guera na Gaza, cual mediadornan Mericano a bisa cu nan tabata haciendo progreso.
Y e por inflama e tension ya presente entre Israel y Hezbollah, cual diplomaatnan internacional tabata purba contene despues di un atake di raket durante weekend cu a mata 12 hoben den e teritorio di Golan Heights.
Israel a conduci un atake incomun diamars anochi den e capital Libanes, cual segun e nacion a mata un top comandante di Hezbollah cu supuestamente tabata responsable pa e atake riba Golan Heights. Hezbollah, cual a nenga cualkier rol den e atake, a confirma e morto di Fouad Shukur diaranson, bisando cu e tabata den e edificio cu a ser afecta. E atake tambe a mata tres hende muhe y dos mucha, segun e ministerio di Salud Libanes.
No tabatin ningun reaccion inmediato for di e White House riba e morto di Haniyeh. Un pregunta clave ta si Israel a conta Merca, su aliado principal, di antemano.
