Despues di revela cu ambos a test positivo pa COVID-19 na cuminsamento di maart durante nan ultimo biahe pa Australia, Tom Hanks y su esposa Rita Wilson a vence e malesa, y despues di ricibi alta medico, a bolbe nan cas na Los Angeles.
Den un entrevista di radio recien, e ganado di Oscar di 53 aña di edad a duna di conoce cu tanto e como su esposa a presenta como boluntario pa duna nan plasma pa desaroyo di un vacuna cu por pone fin na e pandemia di coronavirus.
“Nos tabatin tur sintoma tipico di un grip. Mi esposa tabata un tiki pio cu mi. E tabatin kentura hopi halto y nos tabata isola pa no contagia niun hende”, e actor a splica durante declaracionnan na e posta ‘Wait, Wait… Don’t tell me” di e radio publico NPR.
Contestando si e y su esposa ta sinti como ‘superheroe’, Hanks a menciona cu e y su esposa a descubri cu nan tin anticuerpo cu por yuda mediconan pa combati COVID-19: “Bon, gran parti di e cuestion ta kico ta bay pasa awo. Kico nos haci? Tin algo cu nos por haci? Y de hecho, nos a caba di averigua cu nos ta portador di anticuerpo.”
Den e contexto aki el a revela cu nan lo haci donacion di plasma cu meta pa contribui na desaroyo di un cura. “No solamente investigadonan ta den contacto cu nos. Nos a bisa nan: Bo kier nos sanger? Nos por duna plasma? Y de hecho, nos lo duna esaki na sitionan unda nos ta spera nan por traha riba locual mi lo gusta yama e ‘Hank-cuna’”, e actor Mericano a chansa.
Despues, hariendo, el a agrega: “Mi no lo pone copyright ni keda cu monopolio, ni hiba na oficina di patente.”
