Un pagina di Facebook cu pa ultimo lunanan ta hayando basta atencion ta dedica na un grupo di persona cu hopi biaha no ta vocifera nan creencia publicamente– esta ateistanan.
Atheist Movement & Education Aruba (AMEA) cual ta tene tambe encuentronan publico regularmente ta enfoca riba trece un punto di bista diferente riba e asunto di religion– cual pa mayoria di pueblo Arubano ta Catolicismo.
Di creyente pa ateista
Bon Dia Aruba tabata presente riba un di e encuentronan aki unda diferente discusion a surgi riba e tema di creencia pero tambe ciencia. Loke tabata notabel ta cu mayoria di persona presente tabata creyente den pasado pa via di un rason of otro. Pero despues di pasa algun cambionan den nan bida e fe cu nan tabatin den nan creencia a wordo reemplasa pa un manera diferente di pensa di loke nan tabata custumbra.
Un di e personanan a conta e grupo con despues di hopi retonan financiero el a cay den un depresion cual a haci bida cotidiano pisa. Pero pa un periodo largo e persona a sigui resa pa sali for di e situacion aki. Despues di wordo desilusiona pa e manera con nada no tabata cambiando den su bida, e persona a cuminsa mira otro camindanan pa satisface su deseo pa tin un creencia. E persona a sigui conta con despues cu el a nota cu e otro creencianan aki no tabata ofrece nada satisfactorio– alabes pidiendo pa contribucion financiero– el a realisa cu ningun creencia lo bay cambia su situacion y a dicidi di bira ateista.
Reggie Bermudez di su banda a conta con aunke pa un periodo di mas o menos 12 aña caba e ta ateista y ta debati fuertemente cu personanan riba e topico di religion, tempo cu e tabata creyente el a experiencia algo cu e no por a splica. Sr. Bermudez a conta e grupo con un biaha el a bay un seminario di ‘tapping’ cual ta envolvi touch cierto parti di curpa cu dede pa asina trece sanacion. Aunke sr. Bermudez a haya henter e seminario un poco ridiculo, na su sorpresa e imagennan traumatico cu e tabatin den su mente a disparce despues cu e persona a ‘tap’ e riba su cara varios biaha.
Tolerancia
E combersacionnan cu a tuma luga a eventualmente bay den teritorio di discusionnan cu ta surgi entre creyente y no creyentenan cual hopi biaha ta caba na malo. Julian Jaramillo kende tambe ta forma parti di e movemento di ateista aki a expresa cu aunke e palabra tolerancia pa hopi hende ta encera un concepto simpel, tanto creyente como ateista ta abusa di e concepto. Sr. Jaramillo a splica con hopi biaha creyentenan di cualkier religion ta uza tolerancia como un ‘free pass’ pa impone nan punto di bista y religion riba otro persona. Es mas segun sr. Jaramillo, e argumento aki ta wordo uza hopi tambe pa silencia critica contra actonan discriminatorio.
Sinembargo segun sr. Jaramillo hopi persona incluyendo ateistanan mes ta trata e concepto di tolerancia como si fuera cu e ta algo absoluto. Pues cu lo mester tolera tur tipo di persona y idea. Esaki ta e paradox di tolerancia, segun sr. Jaramillo, citando filosofo Karl Popper kende ta remarca cu pa por defende tolerancia mester no tolera esnan cu ta intolerante.
‘Importancia di respet’
Un otro discusion cu a surgi ta cu pa hopi di esnan cu tabata presente na e reunion ta keda un punto dificil ora mester mantene amistadnan cu personanan cu si ta kere den Dios. Hopi biaha pa ambos banda di e campo ta bin tension pa por anda cu cierto topiconan, un persona a expresa. Sr. Bermudez a subraya cu den hopi situacion ora ateista ta critica cierto aspectonan di un creencia di otro persona e persona ta tuma esaki como un atake personal. Esaki no ta e intencion di e critica, segun sr. Bermudez. Su persona a expresa cu personanan religioso hopi biaha ta tuma debatenan riba religion como insultonan personal mientras cu un debate ta pa stimula discusion y intercambio di idea.
Sr. Jaramillo di su banda ta reconoce cu ta dificil pa separa ‘bo persona di bo ideanan’. Pero esaki ta algo cu pa personanan cu sa debati di bes en cuando ta bira mas facil despues di tempo. Loke tin cu evita ora ta debati, specialmente ora ta trata di religion, ta pa personanan ataca otro di manera ‘ad hominem’ esta personalmente y enfoca riba argumentonan of ideanan.
Movemento tambe habri pa esnan cu no ta ateista
Te hasta un persona cu ta segun e, kere den spiritualidad pero no den religion a bini hunto pa discuti su punto di bista riba religion. E persona ta considera su mes un ateista pero cu si ta kere den spiritualidad. “Mi ta kere den leynan di naturalesa manera gravedad cu a wordo descubri y comproba cientificamente pero alabes pa mi spiritualidad ta un experiencia y interpretacion personal riba algun forsa den universo manera karma.”
Di e manera aki e grupo tambe ta ilustra cu AMEA ta habri pa personanan cu ta religioso pa drenta e grupo of simplemente debati cu nan. ‘Nos no ta contra persona religioso den nos grupo’, sr. Jaramillo ta splica Bon Dia riba asunto di inclusion. “Mi pensamento semper tabata pa no enfoca solamente riba ateista pero tur personanan cu ta cay bou capa di personanan no creyente manera humanista, skepticonan, agnostico, ateista y mas.”
Aunke e grupo aki primeramente ta manifesta den algun pagina riba Facebook, tin pensamento pa haci un organisacion mas oficial den futuro.
