Ayera a tuma luga e reunion publico den parlamento pa retira e confiansa di minister di Infrastructura, Desaroyo Teritorial y Medio Ambiente, Marisol Lopez-Tromp. Den esaki e parlamentario di partido RED, Ricardo Croes a ofrece su discurso den cual a trece dilanti “cu corupcion no ta tuma luga den placa so, sino cu ta tuma luga den palabra of manipulacion di palabra tambe”.

Asina Croes a señala na comienso di su prome ponencia, den cual tambe a expresa cu e la haci un campaña liber di sponsornan compara cu tur otro partido. Di esaki el a menciona cu el a haya un cheque di 2.000 florin mas 250 cash y cu esey tabata e sponsor di e partido na e momento ey; y cu no tabatin ni 200.000 florin ni pa partido ni pa su persona.

Ademas, el a sigura cu e prome fayo di Aruba ta e hecho cu desde 2005 pa 2009 partido RED a haci presencia den parlamento di Aruba. Y Armando Lampe, actual minister, a trece un ley pa financiamento politico, te dia di awe no a percura pa esey, pa loke a puntra ta ken tabatin un motibo pa no pasa e ley ey. Ademas a bisa cu partido Red democratico ta e unico partido desde cu el a cuminsa den ambito politico cu tur eleccion e ta entrega un relato di e placa cu a ricibi y di unda, segun Croes a manifesta.

Croes a splica cu “e situacion aki ta masha straño pasobra nan a publica videonan bunita pa instala e señora como minister y bo mes no por kere cu den par di luna por cambia di estado asina aki”.

Croes a comenta cu el a hiba algun documentonan pa e reunion cu a wordo poni na disposicion pa tur den reunion por mira nan y asina por compronde, entre otro, con e reunion aki a wordo yama y dicon e firma di su persona ta riba e convocatorio di diasabra ultimo 25 di juli. Tabata bisa cu nan kier yama na un reunion publico lo mas pronto posibel pa motibo cu minister Marisol Lopez-Tromp tabata di biahe.

El a referi cu segun comentarionan el a firma e documento ey, cu segun e carta aki, mester bay pa gobernador. “E carta aki ningun momento a refleha e opinion di señor Lampe ni Ricardo Croes.” Asina mes el a aclaria cu nan a haya nan mes forsa di demostra por escrito, di cual a menciona un biaha mas cu corupcion ta tuma luga na papel tambe.

“Ora bo ta coy mi palabranan y cambia nan pa bisa cu esey ma bisa, pasobra bo a wak mi firma y di Rudy Lampe, bo a faya pa Ricardo Croes”, el a specifica.

Tambe, el a comenta cu e situacion aki a trece dilanti den Conseho di Minister comosifuera cu Lopez-Tromp no ta participa homogeno. Y como parti di partido RED nan a haci duidelijk cu “nos no tin ningun problema di confiansa cu señora Marisol Lopez-Tromp, ni un reclamo riba su trabou y esaki nos a expresa den e reunion ey”.

E motibonan di esaki, el a expresa cu nan ta di acuerdo cu minister Lopez-Tromp mester haya su oportunidad den parlamento. Otro motibo ta cu Constitucion no ta conoce un minister sin cartera, pa via cu el a considera cu esaki ta un decision ilegal. Tambe cu na e momento ey nan a trece dilanti e caso di ex-minister Paul Croes, pa locual Andin Bikker na e aña 2017 a bisa cu esaki no por. “Ken ta bay presenta un decision asina cu ta na nan conveniencia? Ricardo Croes no ta parti di e payasada aki.”

Ademas, el a enfatisa cu den e carta tambe tabata skirbi cu minister Lopez-Tromp tabata di biahe na Hulanda y ta p’esey tabata e motibo di urgencia di e reunion, pa loke el a sigura cu p’e ta imposibel pa trata un reunion di e magnitud aki “sin presencia di doño di curpa pa duna cuenta”.

Pa cu esaki el a puntra Lopez-Tromp: ‘ta kico de facto bo a haya cu bo a haya tanto amor asina di bo partido?’

Despues cu Lopez-Tromp a defende su mes den e reunion aki y despues di e break di algun oranan, e reunion a tuma luga back y den esaki fraccion di partido POR, specialmente Dellanira Maduro a informa cu nan lo suspende reunion ‘te proximo aviso’.

Croes a pidi aclaracion pa algun documentonan cu no a yega na parlamento loke a crea un impresion eroneo di e posicion di partido RED, algo cu el a lamenta. Di otro banda el a menciona cu a trece Lopez-Tromp for di Hulanda pa discuti un mocion di desconfiansa, cu den segunda tanda no tabata existi.

Pa finalisa, Croes a reitera su confiansa den minister Lopez-Tromp y el a enfatisa cu e si kier un aclaracion di un posicion fiho pa cu e decision di ayera anochi, pa motibo cu pidi un reunion pa mocion di desconfiansa pa un minister “no ta un cos pa haci wega cune y e declaracion cu minister Lopez-Tromp a haci awe den parlamento no ta cos pa haci wega tampoco”, Croes a bisa.