Awe den oranan di mainta un grupo di personanan cu nacionalidad Venezolano a trece dilanti nan preocupacion den area di aeropuerto, pa motibo cu nan kier regresa na nan pais, pero algun problema di planificacion di autoridadnan Venezolano no ta haci esaki posibel.

Un di e personanan afecta di nomber Alexis Cabrera, ken ta coach di Taekwondo y a yega Aruba nuebe luna pasa, a expresa pa Bon Dia Aruba cu el a bin na e isla pa entrena algun mucha cu ta practica e deporte aki. Na momento cu e crisis di COVID-19 a cuminsa, tur cos a cambia y segun e mes a señala, esey ta e otro parti. E personanan cu a firma pa nan por yega Aruba tampoco a duna nan un man na e momentonan aki.

“Mi a keda sin trabou door di e situacion aki y mi no tin capacidad financiero pa keda dos luna mas”, el a expresa.

Cabrera a bisa cu ayera mainta nan a purba di haya algun contesta na oficina di e aerolinea Albatros, cu ta esun cu ta encarga di haci e vuelonan aki pa Venezuela, pero un biaha mas nan no a kier papia cu e pasaheronan.

“Loke nos kier ta pa haya un solucion pa tur e problema cu nos ta pasando na e momentonan aki, tampoco ta existi e parti humanitario pa algun di nan cu no tin ni un plato di cuminda ni un luga pa drumi”, Cabrera a sigura.

E programa Regreso Boluntario cu Gobierno di Aruba a crea ta ofrece un oportunidad pa esunnan cu lo kier regresa nan pais di manera boluntario; y cu na e momentonan aki ya tabatin mas di 500 persona registra di varios nacionalidad. Den un comunicado nan mes na a duna di conoce cu nan ta den e fase di palabracion diplomatico y partinan logistico cu diferente pais.

Katy Paskel, director di Departamento di Integracion, Maneho y Admision di Stranhero (DIMAS) a bisa Bon Dia Aruba cu desde 7 di april ultimo, nan ta maneha e registro pa e personanan cu kier forma parti di e programa Regreso Boluntario. Por haci e proceso riba e website y registra.

Asina mes, Paskel a informa cu no ta solamente personanan cu nacionalidad Latino Americano cu a registra, sino tambe nan a haya hendenan di Asia, Africa y Europa. Nan ta canalisando e parti diplomatico, na e momentonan aki cu tur frontera ta cera pa via di COVID-19, e vuelonan ta rekeri hopi esfuerso diplomatico pa pidi un vuelo humanitario.

“E unico manera pa logra pa un vuelo bay ta si e paisnan comunica na nivel diplomatico, ta canalisa esey cu e mandatarionan. Den e caso di Venezuela e autoridadnan no a autorisa e vuelonan di repatriacion”, Paskel a menciona.

Tambe, el a trece dilanti cu DIMAS ta traha cu calculacion di riesgonan, nan a calcula cu lo por a haya aprobacion pa e vuelo pa Venezuela prome cu diabierna, pero esey no a sucede. Nan ta traha cu un lista cu mester ta actualisa tur dia, pa asina e autoridadnan di Venezuela sa e informacion di hende cu ta bayendo. Esey “ta algo hopi formalistico”, Paskel a expresa.

“Si autoridad Venezolano a duna nos autorisacion diabierna ultimo, 10 avion por a bay e fin di siman aki cu a pasa ” el a declara.

Di mesun manera, el a laga sa cu e personanan mester paga un pasashi pa bay bek na nan pais y cu e aerolinea mes ta esun cu ta stipula e prijs di e pasashi. Aunke hopi di nan no tin e capacidad financiero pa paga mas di 500 florin, cu e ta e costo pa bay na Venezuela.

Ademas, Paskel a comenta cu na Venezuela mester tin un planificacion y organisacion pa esunnan cu ta yega di otro pais na e momentonan aki pa por keda den cuarentena pa via di e malesa COVID-19. Loke ta nifica cu si no tin luga pa nan mantene cuarentena, e ora ey ta bira mas dificil pa esunnan cu ta na Aruba kier regresa.

Paskel tambe a menciona cu Venezuela ta e grupo mas grandi di e programa aki. Di dos tabata Colombia y di tres tabata Hulanda, cu ya e vuelo ta cla pa bay e siman aki. Di Colombia el a bisa cu probablemente ta cla pa otro siman.

Bon Dia Aruba tambe a busca informacion di parti di minister di Husticia, Andin Bikker, ken mediante su consehero Milko Baiz a comunica cu Aruba a organisa y tin tur cos planifica pa e vuelonan pa Venezuela tuma luga. E prome di nan tabata na comienso di mei y despues cu esey no a haya autorisacion di Venezuela. A planea atrobe otro e fin di siman ultimo y tambe na ultimo ora no a haya aprobacion. Segun Baiz e motibo tabata cu organisacion pa via cu e vuelo mester bay Punto Fijo y despues nan a cambia e destino pa Maiquetia cerca di Caracas, loke ta implica otro planificacion.

Bon Dia Aruba tambe a purba di haya e otro banda di medaya di e articulo aki, na unda a busca informacion cu Consulado di Venezuela, pero nan no a duna ningun tipo di contesta.