Ayera atardi riba su pagina di Facebook, Partido AVP a ofrece un declaracion tocante detencion di ex-minister y parlamentario Benny Sevinger, na unda lider di partido, Mike Eman tabata compaña di otro candidatonan di e partido.
Eman a declara: “E dia di ayera tabata uno na unda Aruba ta bay corda den su historia como un dia caminda podernan cu no tin mag di wordo utilisa politicamente ta haci interferencia den procesonan cu ta afecta stabilidad democratico di nos pais y cu ta afecta severamente e confiansa den estado di derecho di nos pais.”
Segun Eman a sigura, sin evidencia, cu for di cuatro aña pasa miembronan di partido MEP a conspira un acusacion contra Sevinger na Ministerio Publico, y nan a pone presion politico riba e organo hudicial aki pa haci un caso contra Sevinger.
“Nos tur tin motibonan pa ta preocupa pa estado di derecho y democracia” Eman a expresa.
Igualmente, el a sigura cu nan como partido ta kere den inocencia di nan colega Sevinger na unda nan ta conoc’e pa añanan largo “como un persona trahado”. Nan ta expresa nan palabranan di solidaridad cu su mama, su famia y su sostenedonan, cu segun Eman mes a sigura, ta sufriendo e consecuencia di e persecucion politico.
“Rumannan, ban lucha mas duro cu nunca pa dia 25 di juni Aruba vota no unicamente pa su rescate economico, pa rescata e pais aki y pa rescata e sistema hudicial tambe, caminda cu Aruba por bay conoce atrobe un sistema di husticia caminda e pensamentonan imparcial y principionan imparcial ta locual ta goberna nos sistema di husticia”, Eman a comenta.
Tambe Eman a haci su propio acusacionnan, unda a menciona cu nunca nan a mira un caso hudicial inicia contra enrikecimento ilicito di famianan den gobierno di partido MEP. “Un famia a kita miyones di florin pa un oficina di abogado cu a enrikece su mes,” y el a acusa prome minister demisionario, Evelyn Wever-Croes como partner di oficina di abogado aki.
Un biaha mas e institutonan a bira nan cara pa e realidad aki, segun Eman a bisa y cu awe nan ta mira unda cu no tabatin nada; pero a pone presion politico, keda coba y cu te awe no por a haya, segun Eman, pa motibo cu Ministerio Publico mes a bisa cu te na september nan ta tuma un decision. Sinembargo, Eman ta cuestiona con 29 dia prome cu eleccion ta tuma e pasonan aki, na unda pa nan no ta keda otro cu interferencia politico a influencia un proceso democratico pa locual ta tumando luga.
Na mesun momento, tambe a keda conoci cu prome minister demisionario, Evelyn Wever-Croes a publica un comunicado riba pagina di Facebook di Gabinete Wever-Croes, na unda ta indica cu prome minister ta denuncia mentiranan di Sevinger y partido AVP.
E comunicado ta señala: “Locual cu mi ta lamenta ta cu den su desesperacion e ta acusa ami di a bende un tereno pa 17 miyon dollar. E acusacion aki ta totalmente falso. Ami nunca tabata tin otro propiedad cu esun cu mi ta biba aden y nunca mi a bende ningun otro propiedad y sigur no pa un suma di placa asina. Ademas, Benny Sevinger a wordo deteni pa corupcion y si su unico defensa ta pa acusa un otro hende, ta hopi tristo mes”, Prome Minister a enfatisa.
Di mesun forma, Wever-Croes a bisa cu si di berdad e tin un prueba contra su persona, “puntra bo mes dicon nunca e mes no a entrega prueba. Bo sa dicon? Pasobra Sevinger sa cu e ta gaña. Esaki ta simplemente un mentira mas. Ban wak ta cu cua mentira nan ta bin cune mañan”, el a afirma.
Prome minister demisionario a pidi su abogado pa entrega keho penal contra di Benny Sevinger pa “smaad en laster” pasobra e no ta acepta e acusacion aki.
