Tocante caso di turista Mericano cu a comete actonan ilegal; Minister Bikker no ta deacuerdo cu decision di Ministerio Publico

Ayera mainta durante conferencia di prensa, minister di Husticia Andin Bikker a trece dilanti e caso cu a causa hopi conmocion den comunidad tocante un turista Americano cu a comete actonan inmoral contra un mucha muhe menor di edad den area di beach.

Minister Bikker a splica cu e turista a haya un TOM zitting, un boet, a sali liber y bay bek su pais, tocante esaki el a comenta cu den un estado di derecho e ta den desacuerdo y tin diferencia di opinion cu Ministerio Publico (OM) den e caso aki, OM ta un instancia independiente, pero asina minister a participa esaki pa nan.

Di loke ta trata ministerio mes pa evita cu incidentenan asina lo sigui sosode, el a declara cu tin un comision, cu tin como lider un profesor cu ta conseha nan riba leynan penal y Codigo di Procedemento Penal.

E ta bay pidi pa nan conseho por medio di loke nan ta yama aanwijzing opsporing en vervolging, cu lo por duna instruccion na unda por den cuadro di constitucion cu casonan di indole aki cu no por manda nan pa TOM zitting.

Tambe, minister Bikker a bisa cu nan lo informa e fundacionnan cu nan tin derecho na base di articulo 15 di Codigo di Procedemento Penal y cu nan por apela e tipo di decisionnan asina, ademas nan ta presentando den cuadro di tur ley cu nan tin den Parlamento caba cu ta pendiente riba e topico aki.

Asina mes el a splica cu ora OM tuma un decision cu nan no ta bay persigui un hende, den caso aki e persona a paga un boet y ta caba eynan, e personanan, famianan, tin e derecho pa na base di articulo 5 di Codigo di Procedemento Penal pa nan apela esey den Corte Comun.

Den articulo 15, insiso 2 ta bisa tambe cu fundacionnan cu tin den nan statuut cu nan ta protege derecho di mucha, nan tambe tin e mesun derecho di apela e decisionnan asina.

Minister a duna di conoce cu nan lo presenta un nota di cambio caminda cu nan lo amplia por ehemplo, Defensor di Pueblo por aproba pa motibo cu e tambe tin e derecho aki ora tin decisionnan asina.

Na Hulanda y Merca por wordo mira si e persona tin un antecedente,aunke e hecho castigabel a tuma luga akinan nan lo por atende cu nan y por wordo persigui na Merca y Hulanda, esey ta algo cu minister a comenta cu ta den plannan.

El a señala cu famia tambe por yama pa embahada di Merca y haci denuncia di e hecho aki y e persona concerni na Merca por haya cu e ta wordo persigui.