Di loke ta trata e situacion cu a surgi na Savaneta di cual a core un rumor cu tabatin varios cas cu personanan contagia cu e virus COVID-19, DVG y prome minister presidente Evelyn Wever- Croes a presenta nan punto di bista di e incidente.
Di su banda, Sharine Koolman di DVG a relata cu na e momentonan aki tin hende cu ta positivo cu COVID-19 y cu nan mester percura pa proteha esun cu ta banda di dje y isola nan mes.
Di e situacion cu a sosode na Savaneta, Koolman a splica cu si comunidad sigui den e tendencia aki, cu un persona ta positivo pa cu e virus COVID-19 y ta bay sconde su situacion, esey ta e parti cu nan no kier pa sosode, “un estigmatisacion asina no ta saludabel” Koolman a resalta.
Di parti di DVG, el a bisa cu hende mester cuminsa detene esaki cu no lo yuda den nada, sino cu lo duna un efecto contrario, mester tin comprension cu e personanan aki pa motibo cu nan mes no a busk’e y nos tur por haya esey.
Por ehemplo, el a comenta cu ora un ambulance ta yega na un cas cu trahe special esey ta nifica cu algun persona por tin un problema respiratorio no necesariamente por tin COVID-19, esey ta reglanan cu nan tin cu cumpli cune.
“Nan mester cumpli cu precaucion pa esunnan cu ta dunando cuido pa motibo cu si nan ta haya e virus ken ta bay cuida nos?” Koolman a sigura.
Prome minister presidente Evelyn Wever-Croes tocante esaki a manifesta cu e situacion tabata diferente di loke e rumornan tabata bisa, tabata trata di un persona cu a bira malo.
“A mi ta kere cu un di e lesnan di crisis aki ta siña nos pa ta mas empatico y mas humano un cu otro”.
Di loke ta trata estigmatizacion di hende cu a bira positivo, prome minister a comenta cu akinan nan ta trata di victimanan, di personanan cu ta malo di salud cu por ta nan ta victima di otronan cu a pega cu e virus aki, hende cu ta luchando cu su salud y cu nan ta preocupa si nan lo cura of biba, “esaki no ta e momento pa papia malo di otro”, el a finalisa.
