TNO a entrega su prome rapport na gobierno cu ta encera estudionan riba e dump Parkietenbos por wordo cera den un ‘forma responsabel’, teniendo na cuenta e riesgonan pa salud y medio ambiente segun minister di Medio Ambiente Otmar Oduber (POR).
Minister Oduber y su team a splica caba con e proceso aki lo ta hinca den otro, cual lo bay den tres fase. E prome ta short term cual ta encera cu dentro di 90 dia kico esaki ta significa pa Parkietenbos y continuacion di maneho di desperdicio. E di dos fase ta un transitorio pa bin cu un solucion a corto plaso cu lo wordo formalisa na momento cu dicidi kico ta pasa cu Parkietenbos te na momento tin un forma nobo di procesa sushi na Aruba. E di tres fase naturalmente e solucion concreto pa e problema aki na dump.
Den esaki manera ta conoci tin e ‘steering committee’ cu a wordo instala y ayera mainta den e presentacion cu tabata tin di TNO caba a pone un planificacion dilanti pa loke ta trata e TOR (Terms of Reference.) Akinan tin dos caminda pareu cu ta wordo encamina; e steering committee cu tur specialistanan, departamentonan y gremionan na Aruba. Y e di dos ta cu lo saca e TOR aki den januari pa local y internacionalmente por mira e condicionnan di kico kier mira pa sanea na Aruba. “No necesariamente un proposicion pa henter e problema, pero tambe cu e por wordo haci den diferente fase. Por ta bo ta haya un compania cu kier encarga cu saneamento di Parkietenbos di e parti di landfill, por ta un otro ta participa den e destaho publico pa locual lo bira e ideanan y procesonan nobo cu por tin pa por atende cu e desperdicio nobo. Pero e por ta un combinacion tambe di nan dos, y hasta di mas partido cu ta trata y traha,” e mandatario ta bisa. Un di e condicionnan grandi ta cu Serlimar ta keda e instancia cu pa gobierno manera cu ley ta prescribi ta esun cu ta recoge y prepara e aspecto di loke ta sushi na Aruba.
Ta bay tin un teaser di e proceso aki cu lo sali entre Pasco cu cuminsamento di aña segun minister Oduber. Preparando pues tur e comunidadnan internacional y local pa proposicionnan cu nan kier entrega. “Y den e di dos siman di januari 2018 esaki lo wordo poni eyfo pa den un periodo di seis siman por entrega ofertanan na cual naturalmente despues hunto cu e steering committe, cu sosten di TNO, lo mester yega na e combinacion mas adecuado cu ta fit mas cu ta posibel e situacion cu nos tin akinan na Aruba. Y naturalmente cu ta carga e aspecto financiero tambe cu dentro di gabinete lo mester hiba discusionnan riba esaki.”
