Mirando cu ya a drenta varios keho di parti di ciudadanonan unda nan ta di opinion cu polis a actua incorectamente of mucho fuerte durante Toque de Queda, Vanessa Tjon-Kock, Alto Comisario suplente a reacciona riba un caso specifico recien bisando cu polis no por actua suave durante TDQ pasobra esey ta un medida extremo caba, pero cu e intencion no ta pa ningun miembro di Cuerpo Policial abusa di hende tampoco.

E Alto Comisario nobo a expresa esaki tras 3 situacion cu a presenta durante Toque de Queda den e ultimo siman riba cual tanto Bon Dia como portal 24ora a haci reportahe. E prome tabata encera actuacion di Cuerpo Policial na De Vuyst, e di dos ora a drenta den cas di un meneer di fam Istatia, unda segun e meneer polis no a mustr’e orden di fiscal pa por busca su cas, y finalmente un situacion cu a presenta ayera unda un homber mayor di 70 aña di edad segun Cuerpo Policial a resisti su detencion. Despues di esey e persona su yiu a bay riba Facebook y post un potret di su tata su cabes gekap, sangrando.

A entrega keho y lo cuminsa un caso

Segun e meneer di fam Croes a conta Bon Dia, pa 9 or y 45 di anochi un patruya di districto Santa Cruz a presenta na su cas net prome cu e tabata preparando pa bay trabou. Na e momento ey, e persona a declara cu su tata tabata sinta paden ta disfruta di un whiskey cu awa, scuchando musica. Pa e proximo mainta pa 6 or y 10, e persona a haya su tata para na un parada di bus chikito na San Nicolas. “Ora ela subi mi auto, su cabes tabata tur na sanger cu un bandi brasa na sanger, temblando.”, e meneer ta conta. El a puntra su tata con esaki a pasa, y e tata a splica cu mey ora despues cu su yiu a bay traha, mas cu un unidad di polis a yega na e cas, habri porta, drenta paden, tumba su tata na suela, golpi’e na cabes, pa djey lastr’e pafo. E por a mira tambe ora a yega cas cu berdad tabatin un lastra di sanger riba vloer cu tabata bay di paden te pafo di cas. Na final a boei su tata. E persona a indica cu su cas tabata completamente habri ora el a yega, lagando radio y stoel benta abou.

Pa via cu a drenta sin un papel di fiscal, of hues, e persona ta haya a actua incorectamente, y pa e rason ey a dicidi pa entrega un keho na un fiscal situa na San Nicolas. E fiscal, segun su persona, a duna e cu su tata nomber di e agentenan cu a bay presenta na e sitio, mirando cu nan kier cuminsa un caso contra e agentenan aki. “Nan a actua contra ley, sin mustra un papel cu ta autorisa nan pa drenta den mi cas, y pa colmo ta golpia un homber cu un djis ta cumpli 72 aña di edad, y a laga e cas habri pa asina ladron por a haya chens di horta.” Adicionalmente, segun e meneer, a duna su tata un boet, ‘manera cu e tabata pafo durante TDQ’.

Polis su banda di medaya

Alto Comisario, riba pregunta di Bon Dia, a duna di conoce cu Toque de Queda no ta un medida suave y pa e rason ey polis no mester actua suavemente, ‘ni tin waarschuwing’ pasobra na e momento ey niun hende tin mag di ta riba caya. Sinembargo, Tjon-Kock a splica cu tampoco ta e intencion pa cualkier miembro di Cuerpo Policial comete abuso. Pa e rason aki, KPA ta actua den cuadro di e regulacionnan stipula, unda ta bisa claramente ki autorisacion polis tin pa haci kico.

Den e caso aki specifico, Tjon-Kock a splica cu esaki tabata e di dos biaha cu polis mester a presenta na e cas pasobra tabata toca muziek mucho duro. “E miembronan di Cuerpo Policial a actua manera cu mester ta na prome instante. Na e di dos biaha ora nan a topa e mesun persona, tambe tin cu wordo bisa cu e persona a resisti su detencion. Na momento cu bo ta resisti detencion di Cuerpo Policial, nan tambe tin nan procedura na momento di detencion.”

“Berdad ta cu nos ta papiando di un persona di edad, di 70 aña, y semper y cuando trahando cu leynan stipula pa Cuerpo Policial y/of Ministerio Publico, bo tin cu mantene bo mes na e limitenan. Bo tin cu tene cuenta cu proporcionalidad. No ta algo cu bo ta bay abusa di ningun persona.”, Tjon-Kock a splica.

Sinembargo, ‘sin bay den mucho detaye’, cu den e caso aki e agentenan tabata autorisa pa detene e persona. “Pa loke ta trata su vivienda, manera cu ta haci e pregunta, no tabata e caso cu a drenta su vivienda, pasobra esey naturalmente bo tin cu papia cu Ministerio Publico, mirando cu ley ta bisa cu bo no por djis bay cana drenta, mirando cu mester tene cuenta cu cierto criteria. Esaki tambe ta loke cu a pasa. Pero e kapmento na e meneer su cabes, tabata relaciona cu e resitencia di e meneer mes durante su detencion. Asina ora a yega na e procedura di detencion, esaki a tuma luga ora cu e coleganan tabata bezig cu e meneer.”