Tur persona cu ta bira hende grandi mester tin un calidad di bida, pa motibo cu nan mester fomenta e embehecemento activo, y asina potencia e participacion di integracion di e hendenan grandi den comunidad, como tambe stimula e mantenemento activo, tanto na nivel fisico como psicologico.

Grupo Uni ta un grupo di hendenan grandi cu a ser crea na aña 1978. Ta trata un directiva di un comision di mayornan y un comision di sede di bario Noord. E grupo tabata consisti di nuebe persona, cu na e momentonan ey a crea e organisacion, y su meta tabata pa saca e hendenan grandi cu tabata isola for di nan cas.

Bon Dia Aruba a haci un entrevista cu un representante di e Grupo Uni, sra. Titi Tromp. El a splica cu e tempo ey, hende muhe grandinan no tabata bay pa niun caminda, su trabou tabata pa haci trabou den cushina, haci e cas limpi… pero nan no tabatin ni un sorto di distraccion of actividadnan pa haci.

Tromp a comenta cu despues e grupo a bira mas grandi y a yega te 25 hende. Nan tabata reuni tur diaranson mainta na e sedenan di bario, e actividadnan tabata trata di bishita hospital, balia, canta, of haci comedia, pa entretene nan mes y haci bida mas activo.

Di mesun manera, el a bisa cu prome e grupo tabata yama Coffie Morgen, y despues nan a cambia su nomber pa Grupo Uni. Tambe el a expresa cu tur diaranson cada 15 dia nan mester bay e sede di bario Noord pa haci su actividadnan.

Na cuminsamento, Tromp a bisa cu nan no tabata paga nada, pero despues nan a pensa cu nan tabata mester di placa pa e grupo su mantencion y contribucion pa su actividadnan. Cu esey nan tabata haci bono di Pasco, y nan tabata spaar pa asina nan por biaha. El a manifesta cu nan como Grupo Uni a biaha hopi mes pa varios pais, como por ehempel hunga comedia na Corsou, show na Boneiro, tambe nan tabata haci comedia na hotelnan y Cas di Cultura.

Na e momentonan aki, Tromp a expresa cu e grupo no tin hopi reunion. Esaki pa motibo cu su integrantenan a bira basta grandi. E grupo a celebra su di 40 aniversario aña pasa, el a sigura cu su experiencia tabata hopi bon, ‘nos a pasa hopi dushi, nos a haci hopi actividad’.

Na e momentonan aki, e coordinador di e grupo ta Sra. Edna Zievinger cu sra. Carmen Frans. Nan tin un comision encarga cu distinto eventonan di e comunidad, como un comision di Carnaval, Comision di Aniversario di Grupo Uni, Comision di Mama y ainda mas.

Tur e comisionnan aki consisti di 3 of 4 persona, kende ta haci na nan manera pa e actividadnan. Tromp a informa cu e aña aki, el a sali como Mama di Grupo. “Nan ta uni, nan ta traha bon pa tur e hendenan grandi.”

Aworaki ta existi varios grupo di hendenan grandi den diferente districto di e comunidad, por ehempel, e Grupo Uni y otro na Kibrahacha, unda e hendenan grandi por bay, siña algo, haci obra di man. Ademas, nan ta haci varios actividad pa hendenan grandi no keda cera na cas sin haci nada, y asina nan por desaroya formanan nobo pa ocupa nan mente y nan tempo liber, pa no perde sentido di comunidad y di bida mes.