Recientemente, Centro di Control y Prevencion di Malesa Contagioso Mericano, CDC, a duna un conseho negativo di biahe pa Aruba y a pone nos isla riba nivel 4 di riesgo pa Covid-19. CEO di AHATA, Tisa LaSorte, a comenta cu esaki no tabata un sorpresa.
“Cu tanto caso di COVID na Aruba por a spera e sistema di alerta na Merca hisa nos pa nivel 4”, el a comenta na Bon Dia Aruba. “Ta mucho trempan pa sa e efecto di e alerta riba nos economia, pero ta logico cu nos por spera mas cancelacion den turismo. Specialmente di gruponan.”
Mientras cu no tin hopi cu por haci pa purba di minimisa e efectonan economico di e desaroyonan actual di e pandemia di coronavirus na Aruba, LaSorte ta recomenda pa toch tur hende purba di cumpli cu protocolnan di seguridad. “Nos por evita e brotenan grandi si sigui e reglanan di distancia y tapaboca. Y evita aglomeracion.”
A pesar cu mayoria di poblacion na Aruba actualmente ta vacuna, segun LaSorte, nos mester keda cauteloso mirando e variante Delta, cu ta mas contagioso. “Cu e variante Delta, e virus ta plama hopi mas lihe. Y ainda tin demasiado hende cu no ta scoge di proteha nan mes. Ni cu vacuna ni cu medida.”
“Mientrastanto, e peliger grandi no ta solamente e efecto riba nos economia, pero tambe riba e disponibilidad di cuido medico na hospital. Nos lo keda experiencia e ciclonan asina, si nos comportacion sigui mescos”, LaSorte a agrega. “Aunke semper tin algun cu no ta cumpli, medida ta yuda baha cantidad. Medidanan y vacuna ta yuda pa tin menos caso serio y menos contagio. Ta dificil pa compronde pakico tanto hende ta nenga di proteha nan mes y hende cu nan ta stima.”
